Shillong, Jylliew, 29: U MLA barim ka Mawlai Constituency Bah P.T Sawkmie, u la pynpaw ïa ka jingsngewe bynniaw kaba jur halor ka jingthmu ban pynsangeh treikam noh ïa ki 200 ngut ki nurse ha NEIGRIHMS Hospital.
U Bah Process ula ong ba lada kine ki 200 ngut kin duhkam, ka mut da ki hajar ki longïing longsem kin shah ktah khamtam ïa kito kiba wan na ki longïing kiba duk bad kiba don ruh ïa ki khun ki kti.
Lah ban kdew hangne ba kine ki nurse ba shah weng kam ki dei jong kawei ka Agency ba shimwai ban pynbiang ïa ki nurse ha NEIGRIHMS hospital mynta la bun bun snem.
U bah P. T Sawkmie u la kyntu ïa ki Agency ba kan pynsngew ïa kane ka kam sha u Director ka NEIGRIHMS ba un pynneh biang ïa kine ki nurse ha ka kam.
U la ong ba kine ki arspah ngut ki nurse ki dei kiba la don jingshemphang bha ha ka kam bad lada yn pynsangeh noh ïa ki, kan sa don ka jingktah kaba khraw ïa ka jingsumar ha kane ka hospital ka Sorkar pdeng.
Une u MLA barim ula kyrpad ruh ïa u Director ka NEIGRIHMS ban pyrkhat biang sa shisien shuwa ban weng ïa kine ki nurse.
