Khliehriat, Rymphang, 13: Ki dkhot bad nongïalam jong ka JNC Sumer Circle ba hapoh ka jingïalam u President ka Circle, u bah Sakilan Chyrmang mynta ka sngi ki la leit ban iakyrshan ïa ki paidbah jong ka thaiñ Sumer kiba pynlong jingïalang hajan ka jingkieng Rimanar bad na ka liang ka seng ruh ka maham jur ïa ki kali heh kiba kit palat pud kiba iaid lyngba na kane ka jingkieng kaba dei ka jingkieng kaba la synjor.
Katkum ka jinglap jong ka seng ruh la ong ka katei ka jingkieng ka la sator bad synjor bha bad la paw shynna ruh ba ki screw, ki baltoo ki lah sdang tlor noh na ka jingkit palat pud ki kali heh, tang na ka jingiaid ki kali ruh la mih ka jingsawa ba shyrkhei bha na kane ka jingkieng bad kane ka buh ka jingma kaba khraw haduh katta katta iaki nongleit nongwan kiba iaid lyngba na kane ka jingkieng.
“Ka seng naka por shaka por ka pynkynmaw ba ym dei shuh ban iaid kali heh na kane ka jingkieng lada ka jingkit ka khia 40 50 ton namar kane ka jingieng ka kot bor tang 8, 9 ton hynrei ym don ba sngap bad kane ka jingleh ki riew shimet kiba ioh myntoi ïalade ka lah ban wanrah ka jingduhnong kaba khraw ïa ki nongshong shnong ka thaiñ, namrkata ngim banse ban maham bad khang noh shi syndon ïa ki kali heh ba kit palat pud bad ngi kyrpad ruh ïa ki nongshong shnong ka thaiñ ruh ba kin iatreilang ba lada lap iano iano kiba leh tam ba dei ban kem noh shisyndon bad pynshitom da kaba tyngeh” Ong u President ka Circle.
U nongïalam ka JNC na Sumer Circle, u pynpaw ba ka seng ruh ka ladep ban phah jingthoh ha ki por mynshwa sha ka tnat PWD ban maramot noh ia kane ka jingkieng kaba la kynjoh sha ka rta kaba 40 snem hynrei ym don ban peit ïa ka.
