Jowai, Rymphang 13: Ka Jaiñtia National Council JNC-Western Zone ha ka 12 tarik Rympang hapoh ka jingïalam u bah Leo Ferdinand Dhar President WZ kala hiar sha ka Shnong Muktapur halor ka jingjia ïa uwei u para doh para snam uba long ruh u Doctor ka Veterinary ba shah leh Thombor ha ki shipai BSF.
Ha ka jingleit tohkit ka seng ryngkat ki nongsakhi ha katei ka jingjia bad ruh ryngkat ki trai shnong ka seng ka la ïoh ban tip ïa ka jingshisha ba ka jingleh donbor ki BSF sha kitei ki thaiñ ka long kaba lah palat ha kaba naka por sha ka por ka ïai jia bad ka pynthut ruh. Ïaka ïaid ka ïeng ki nongshong shnong katei ka thaiñ naki kti ki BSF.
Halor ka jingjia ka seng ka la ïakynduh markhmat bad u SDO Amlarem ha kaba naka liang jong u SDO ka Amlarem u la pynlong daka jingïalang hynnin ka sngi ha ka jingdon ryngkat u Waheh Shnong Muktapur, ki nongshong shnong, u incharge ka BSF bad ki Nongïalam ka JNC-Western zone ban ïashong pyrkhat halor kato ka jingshah leh donbor jong u doctor haki BSF bad da kawei ka sur, ha kane ka jingïalang la Rai ban buh noh daka Independent Inquiry bad la buh ruh ïaka por ba dei ban pyndep hapoh 2 taïew ban tohkit bniah ïakatei ka jingjia.
