Maham ka HITO ïa ka jingthmu thung kam sopsop bad ïaid lait na ka DSC hapoh DM&HO

Mawkyrwat, Nohprah, 19: Ka Hynñiewtrep Integrated Territorial Organisation (HITO), South West Khasi Hills District ha ka sngi Palei ka la aiti da ka jingthoh sha ka ophis District Medical & Health Officer (DMHO), South West Khasi Hills District ba la kynnoh ba ka don jingthmu ban thungkam da kaba ïaid lait na ka District Selection Committee (DSC).
Hapoh ka jingïalam da u President ka HITO, South West Khasi Hills District u Paul Thyrniang ka long hadien ba ka seng ka la wad bad ïoh jingtip ba tikna ba kat haduh mynta ki don haduh 14 tylli ki kam kiba la lait thylli kiba kynthup ïa ki post Grade IV, Driver, Chowkidar, Ward Boys, Ward Girls, LDA bad kiwei kiwei ïa kaba ka ophis jong u DMHO, ka la pynsahteng ban pyntip shapoh ka District Selection Commitee (DSC) la kham slem, hynrei la shu thung da ki nongtrei ba shipor bad la siew pat da ka tulop sorkar, da kaba buhteng sah ban pyntip sha ka DSC.
Kumta, ka seng kam lah ban shu shongkli kti, hynrei ka la leit buh syndon da ka jingthoh sha u District Medical & Health Officer (DMHO), South West Khasi Hills District, ba u dei ban shimkhia pyntip noh mardor shapoh ka DSC ïa baroh ki kam ba lait kiba hap hapoh ka tnad treikam jong u, lym kumta ka seng kam banse ban pynlong da ka jingïakhih paidbah ryngkat ki samla khlem kam kiba hapoh ka South West Khasi Hills District.
Ka seng ka la pyntip ruh ïa kane ka kam sha ki bor ha khlieh ba kin shimkhia kloi katba lah, bad lada ka don ka jingpynslem bad thmu da kumwei, ka seng kan nym ai lad, ka hap ban shim da kiwei pat ki synjam kiba eh, ong u kyrwoh ba la phah da ka seng.