Shillong, Nailar 26 : Ka Mawkhar SC ka la mad ka nam jop kaba nyngkong ha ka lympung ïalehkai OC Blue Shillong Premier League (SPL) 2021-22 hadien ba ka la pynliem da 2-0 pyrshah ïa ka Malki SC ha ka jingïalehkai ha ka sngi Thohdieng ha madan Third Ground, Polo, Shillong.
Ïa ki ar kol la thep da u Banehskhem Khongsdam bad u Defender Pyngrope. Kane kadei ruh ka sien kaba nyngkong ba ka Mawkhar kan thep ar kol ha baroh ki jingïalehkai.
Haba mih madan ha ka sngi Saitjaiñ, ka Malki ka don ha ka kyrdan kaba hynñiew katba ka Mawkhar kaba don ha trai duh na ka miej kheiñ point ka kamai 3 point.
Haba phai sha ka jingïalehkai baroh ar tylli ki team ki la pynlehnoh ei bun tylli ki kabu thep kol ha kaba ka jingïalehkai haduh kaba kut ka kylla step ki khlem lah ban ïathep kol.
Haba wanphai sha ka jingïalehkai jong ka kylla miet, baroh arliang ki la ïakhun tyngeh ban thep kol, bad dei u Banehskhem Khongsdam uba la ïoh ban pynkhih jar nyngkong na bynta ka Mawkhar ha ka minit ba 57 jong ka jingïalehkai kaba la sdang ban shongshit bha ka jingïalehkai.
Ki rangïalehkai ka Malki ki la ïakhun tyngeh ban pynphai ïa katei ka shi kol bad hynrei ki khlem lah ban pyndep ha ka liang ka thep kol. Ki rangïalehkai ka Mawkhar ki la lah ban treh lakam bha bad ïoh bat slem ïa ka bol ha kaba ki la tur naphang sha ka kut jong ka Malki.
Bad hapdeng ka jingïalehkai kaba la sdang ban ïakhaid bha ha ka liang ka thep kol, ka Mawkhar ka la ïoh ban thep sa ïa ka shi kol lyngba u Defender Pyngrope ha ka minit ba 66 jong ka jingïalehkai. Lyngba kitei ki ar kol ka la nang ai mynsiem shuh shuh ïa ka kynhun jong ka Mawkhar ha kaba ka la lah ban khanglad ïa kiba bun ki jingpyrshang thep kol ki rangïalehkai ka Malki.
Kumta haduh kaba kut ka jingïalehkai ka Malki watla ka la pyrshang ban pynphai hynrei ka khlem ïoh lad satia ha kaba ka Mawkhar ka la khur ïa ka nam jop kaba nyngkong da kaba pynliem da 2-0. Lyngba kane ka nam jop ka Mawkhar mynta ka don ka jingkyrmen ban ym shah pynhiar kyrdan lada ka dang bteng ban khur nam jop ha ki jingïalehkai ba dang sah.
Mynta ka sngi, ka jingïalehkai kan long hapdeng ka Ryntih SC (14 point) kaba don ha ka kyrdan kaba saw pyrshah ïa ka Nangkiew Irat SC (13 point) kaba don ha ka kyrdan kaba san ha ka por 4 baje janmiet.
