Da ka jingpynïakop mareh ba 5km yn rakhe ïa ka National Sports Day 2022

Pynrung kyrteng lyngba ka bit.ly/3KhSIn6

0

Shillong, Nailar 26 : Kum shi bynta ban rakhe ïa ka sngi jong ki jingïalehkai ne ka National Sports Day kaban long ha ka 29 tarik Nailar 2022, ka ophis jong u District Sports Officer ka East Khasi Hills District, Shillong ha ryngkat ka jingïatreilang ryngkar bad ka ophis ka Deputy Commissioner ka East Khasi Hills District kan pynlong da ka jingïakop mareh, “National Sports Day 5K Run” ha ka 29 tarik kaban sdang na Main gate J.N Stadium ha ka por 6:30 baje mynstep.
Nalor ka jingïakop mareh, yn pynlong ruh kiwei ki jait jingïalehkai kum ka Invitation Inter School Mawpoin bad Tug of war Competition ha Basketball Court J.N Stadium, Polo Shillong kaban sdang naduh ka por 9 baje mynstep, ka Recreational bad Fun Games for Children ha Football Grass Root Centre jong ka East Khasi Hills District kaban pynïalehkai ha ka 27 tarik Nailar 2022.
Ki lynti na bynta ka jingïakop mareh National Sports Day 5K Run yn sdang na J.N Stadium Main Gate, Polo, Shillong – S.R.G.T Main Gate – Golf Club – Lad Shyiap ter ter sha MPPS – Lad Sanker – Mawroh Junction – F.C.I Junction – F.C.I – MeECL – Shillong Secondary School – C.R.P.F Main Gate – S.R.G.T Main Gate bad pynkut biang (Finishing Point) ha J.N Stadium Main Gate, Polo Shillong.
Na bynta ka jingïakop mareh la khot sngewbha ïa baroh shynrang bad kynthei bad ïa ki nongjop yn sam da ka khusnam song pisa ha ryngkat ka trophy bad ki syrnot. Kiba jop ha ka kyrdan ba nyngkong kin ïoh khur ïa ka song pisa ba 5,000 tyngka, ba ar 3,000 tyngka bad ba lai 2,000 tyngka. Kan don ruh ka consalation prize na bynta kiba wan ba saw haduh ba phra kata mar 1,000 tyngka.
Yn ai khusnam song pisa ba kyrpang ruh na bynta ki nongmareh ba la rangbah tam (50 snem shaneng) kiba pyndep ha ka kyrdan ba san ha kaba kin ïoh 1,000 tyngka. Ka ophis u DSO ka bthah ïa kiba kwah ban ïashim bynta ba kin pynrung kyrteng ïalade lyngba ka online ha ka bit.ly/3KhSIn6 bad kin shim ïa ki sopti bad ki number na ka ophis u District Sports Officer, East Khasi Hills District, Shillong kaba don ha J.N Sports Complex Polo, Shillong ha ka 27 tarik Nailar 2022 naduh ka por 10 baje mynstep haduh ka por 5 baje janmiet.
Yn sam ei khlem jingsiew ïa ki spoti (T-Shirt) ha ka 29 tarik Nailar 2022 naduh ka por 6 baje mynstep kata tang ïa kito kiba la dep ban pynrung kyrteng. Ka ophis jong u District Sports Officer, East Khasi Hills District, Shillong ka khot bad wer ïa baroh ki nongshong shnong jong ka ri India ba kin wan ban ïashim bynta ha katei ka jingïakop mareh.

Leave A Reply

Your email address will not be published.