Shillong, Naitung 27: Ka Nongkseh ka la mad ïa ka jingjop ha ka jingïalehkai ba nyngkong jong ka klob ha ka Shillong Premier League da kaba pynliem ïa ka kynhun ba marjan, ka Mylliem hynne ka sngi Nyngkong ha madan First Ground-SSA Stadium.
Ka Nongkseh ka la jop da tang 1-0 kol ba la thep da u Aibiangmame Nongneng (45’+5) ha kane ka jingïalehkai kaba jur bha hapdeng ar tylli ki kynhun ïalehkai ka Upper Shillong.
U G Marwein, referee ba pynïaid ïa ka jingïalehkai, u la hap ban kloh ïa ka pla ha kiba bun ki khep, ha kaba katto katne ngut ki nongïalehkai ki la shah pynshitom da ka yellow card bad baroh arliang ki la shah pynduna uwei u nongïalehkai namar ka red card shuwa ban sawa ka jingsiaw (whistle) kaba khatduh.
Ka Mylliem ka la ïalehkai kham pynkhlaiñ shadien ha ka kylla step, bad ka thmu ban thombor ïa ka Nongkseh tang ynda ïohlad ban rah kynsan kynsan ïa ka bol, hynrei kum kine ki khyllipmat ki long kiba duna bad ka kynhun ka la kham pynleit jingmut ban kyrshan skhem shadien.
Hynrei ka jingpyrshang jong ki ka la shah pynpulom noh hadien ba u Aibiangmame ula pynkhihjar ha ki minit pynjlan shuwa ban jam sha ka por shongthait ban buh hakhmat ïa ka Nongkseh.
Ka Mylliem ka la hap ban tur shakhmat ha ka kylla miet hynrei ka la shah pynduh jingkyrmen hadien ba u Shaibor Nongrum u la shah beh noh na madan hadien ba ïohpdiang ïa ka yellow card kaba ar. Hynrei tang katto katne por ka jingdon ki player ha madan ka la long mar katjuh naba u Arlangky Nongsiej ka Nongkseh u la shah beh noh da kaba ïohpdiang ar sien ki yellow card.
Ka jingïalehkai ha kane ka sngi Ba-ar kan long hapdeng ka Rangdajied United bad ka Meghalaya Police ha ka por 6:30 baje janmiet. Ha u snem ba ladep ka Rangdajied ka la wan ba-ar ha ka SPL, katba ka MLP ka la kiew kyrdan na ka First Division. Kane kan dei ka jingïalehkai ba nyngkong jong ka MLP ha ka SPL naduh u snem 2018.
