Lynïar ki paid nongleit nongwan na Shillong sha Guwahati ba jur ka dheng kali hapdeng Jorabat bad Khanapara

Shillong, Iaiong 7 : Ka Surok bah na Guwahati sha Shillong kaba la pynsuk bha ïa ka leit ka wan jong ki paidbah hadien ba la dep shna pynbha bad pynheh ïa ka ban ïaid saw tylli ki kali naduh u 2018 kyndit kyndit mynta ka la kylla long ka surok jongka jingduh jingkyrmen jong ki paidbah namar tang shu poi ha Jorabat shaduh Khanapara la jur ka jingdheng kali kaba la pynlong ïa kiba bun ki nongleit nongwan ban duh leit jingleit namar la duh noh ïa ki liengsuiñ ba ki dei ban leit ne ïa ki rel ruh. Ym tang katta ïa kiba leit shim dawai ne leit ïa kynduh doktor ruh teng teng kim ïoh ïa kynduh shuh namar ba la dier ka por tang namar ka jingdheng kali ha katei ka jaka.
Mynta haba ki briew ki leit jingleit bad poi ha Jorabat bad Khanapara ki la mad ïa ka jingdheng kali kaba da ki kynta ka la long kum ka jingphoh sniew kynsha aiu ruh tang shu poi ha katei ka jaka ka daw ka dei tang namar ba ka don ka jingshna pynbha ïa ka surok kaba tang 100 metre ha katei jaka hynrei namar ba suki palat ka kompani ba shna ïa katei ka surok ka la buh ïa ki paidbah ha ka jingeh kaba khraw bha. Katei ka surok kaba dang pynbha mynta ka dei na ka liang jongka Meghalaya.
Uwei na ki nongthoh khubor uba leit jingleit ha ka Sngi U Blei 6 tarik uba dei na Shillong um banse ban thoh ha ka X jongu ne ka Twitter mynshwa ban pynpaw ïa ka jingktang mynsiem jongu namar u la sahkut da ki kynta bad u la ujor shaduh u Myntri Rangbah ka jylla, ka NHAI bad kumjuh ruh sha u Nitin Gadkari myntri ka sorkar pdeng ba dei peit ïa ka Road Transport. U la pynpaw sha kitei ki heh sorkar ba kane ka dei ka surok hapdeng Jorabat bad Khanapara kaba tang 100 metre kaba dang pynbha mynta hynrei namar ba suki palat ka jingtrei ka la buh ïa ki paidbah ha ka jingeh kaba khraw khamtam kiba leit jingleit ban beh ïaki liengsuiñ bad ki rel , kiba leit shim dawai namar ki sahkut da ki kynta man la ka sngi ha katei ka jaka. Ki don kiba kynnoh ba ka dei ka jingkhrong pisa ki pulit na ki trok, don kiba kynnoh ba ka jingai mon ki pulit ïa ki trok ba kin ïeng katba mon ha baroh arliang ka surok bad leh mynleh ban talasi ïa ki kot ki sla jongki katba ka jingthmu ka long ban ïoh dawa pisa na ki bad bun bah ki jingkynnoh ba har rukom.
U kontraktor uba pyntrei u leh katba u mon ïa ka ktieh ne ka synrum ba u khur na nala u buh hapdeng surok katba ki bor pulit kiba ïohi ïa kane ka jingeh ba ki paidbah ki mad kim leh ei ei satia. Ha ka Sngi U Blei ki kali kiba hiar na Shillong ynda ki la poi ha Jorabat ki la sahkut palat ïa ka 3 kynta. Kiba bun ki nongleit nongwan, ki nongpang, ki tymmen ki kro, ki longkmie ba pun khun, ki khynnah khyllung ki hap ban mad ïa ka jingeh tang shu poi ha katei ka jaka nalor ba jur sa ka pum pum bad ka jingshit ka suinbneng. Barobor ïa ki trok la shah ban ïaid hadien ka 9 baje hynrei ha ka Sngi U Blei la shah ba kin ïaid naduh mynsngi.
Haba mynta ka jylla ka dang sdang bha ban kiew ha ka kam jngohkai pyrthei hynrei lada kum kane ka jingïakynduh ki paid nongwan jngoh kai sha ka jylla ki ïa kynduh hato kam ktah ia ka kam jngohkai ha ka jylla Meghalaya. ïa ki Myntri Sorkar, ki heh sorkar , ki ophisar kam don jingeh namar ki tang shu pynriew ka siren ki la ïaid katba ki mon wat lada dei na ka surok bym dei ban ïaid ruh, hynrei ki riew paidbah pat te kim lahban leh kumtei.