Lyngba u Gaurav & Macdonald, pynliem ka Ri-Bhoi District ïa ka Shillong Cricket Association B

Shillong, Nailur 27: Ka jinglah ban lehkai bha jong arngut ki player tied ka Ri-Bhoi District Cricket Association, kata u Gaurav Narleng bad u Macdonald Makdoh ka la ïarap ïa ka kynhun ban khur ïa ka namjop da 4 wicket ha ka jingïakhun pyrshah ïa ka Shillong Cricket Association B na ka Zone 1 jong ka Group A ha kane ka lympung Meghalaya Cricket Association’s U-19 Boys Inter District Cricket Tournament kaba la long ha Umbuda, Nongpoh, hynne ka Sngi Balang.
Ha ka toss ka Ri-Bhoi District Cricket Association ka la jied ban phah tied nyngkong ïa ka SCA-B, bad kane ka kynhun ka la ïoh ban kamai 185 bad shah pynhap 8 wicket na ki 28 over.
U Trinayan Dutta u la long u rangtied ba la kamai bunron tam na bynta ka kynhun da 90 ron naki 76 bol (10x4s, 5x6s), katba u Manthan Dey contributed u la ïarap 38 naki 24 bol (4x4s, 3x6s); kine ki arngut ki la kyntiew da 81 ron shuwa ban hap saw wicket.
Hynrei ka jingkamai ron na ka SCA-B ka la sdang ban hiar hadien ba kine ki arngut ki la shah pynhap noh; u Trinayan u la hap lyngba ka run out, katba u Manthan u la shah pynhap ha u Benedict J Makdoh (3/36).
Na ka liang jong ka kynhun lehkai jong ka Ri Bhoi District ka la duh jingkyrmen shipor hashwa ba u Gaurav bad u Macdonald kin ai mynsiem biang ïa ka Ri-Bhoi kaba la duh haduh 5 wicket tang 43 ron na ki 11.3 over kiba la ïaid, ban beh ïa ka ron kaba haduh 186 ban jop.
ïa kane ka jingïalehkai la pynduna sha ka 28 over ïa baroh ar kynhun, kaba mut ba kitei ki arngut ki donkam ban kamai kajuh lane palat ron na ki hynriew bol mana ka over. Bad ïa kane ki la lah ban leh, ha kaba u Gaurav u la ïoh ban khyrwit haduh saw tylli ki four bad hynñiew tylli ki six ban kamai haduh 62 ron naki 30 bol, katba u Macdonald u la ïoh ban kynjoh ïa ka 62 naki 35 bol da phra tylli ki four bad saw tylli ki six.
Hadien ba u la kynjoh sha katei ka ron kaba la pynïoh mynsiem biang ïa ka kynhun, u Gaurav u la shah pynhap noh ha ka over ba 19 hynrei u Macdonald u la bteng ban pynïoh namjop sha ka kynhun ha ka over ba 23. U Toshar Hajong u la long u rangkawangbol ba seisoh tam na bynta ka SCA-B da kaba khur 2/27, katba u Harris Ahmed u la khur 2/48.