K a jingmih pyrthei jong ka Voice of the People Party hashwa ka eleshon sha ka Ingdorbar Thawain ka Jylla ha u snem 2022 bad ka jingjop jong ki saw ngut ki kyrtong ha ka elekshon MLA kaba dang shu dep long ha u bnai Rymphang, 2023 ka la pynkyndit ïa kiba bun ki seng sainpyrthei ki bym shym la poi pyrkhat ba kane ka seng sainpyrrthei ba la ïalam da u nongïalam barim ka FKJGP u Bah Ardent Miller Basaïawmoit kan jop haduh saw ngut ki kyrtong tang mar ïa mih madan ha kane ka kynti. Hadien ka elekshon MLA ka sur jong VPP ka la nang sawa jam sha ki kyndong kynshrot jong ka jylla hadien ba u Bah Ardent dalade hi u la hiar sha kiba bun ki shnong ha kylleng ki district ka rilum Khasi bad Jaintia ban pan jingkyrshan na ki paidbah hadien ba ka Party ka la pynbna ïa ka kyrteng jong u Dr. Ricky J. Syngkon kum u kyrtong na ka bynta ka elekshon Lok Sabha ka ban sa long ha u snem 2024.
Haba bishar na ki jingïalang kiba ka VPP ka pynlong ha kylleng ka rilum Khasi bad Jaiñtia, ki paidbah ki la mih shakhmat ban pynrung dkhot ïalade bad ban ai jingkyrshan ruh ïa ka Party namarba ki kwah ban mad noh da ka seng riewlum kaba thymmai hadien ba ki ladep mad da ki phew snem ïa ka Congress, khyndiat snem ïa ka NPP bad ïa kiwei ki seng riewlum kum ka UDP, ka HSPDP kiba la long ki sengriewlum kiba la rim bha ha ka jylla hynrei lait noh tang ïa ka All India Trinamool Congress kaba dang shu wan iuhkjat shwa ka elekshon MLA 2023. Watla katta, ki paidbah ki ladep mad ïa kijuh hi ki nongïalam jong ka AITC mynba ki MLA jong kane ka Party ki dang don hapoh ka Congress shwa ban phong ïa ka Uniforim jong ka AITC. Ïa ka BJP lei lei, ka sur ki paidbah hi kim mon satia bad lehse kata ka shong ha ka jingpyrkhat shimet jong ki nongthep vote.
Watla ka elekshon sha ka Ingdorbar Thawain Lok Sabha ka dang shimpor sa katto katne bnai namarba ka Election Commission of India kam pat pynbna ïa ka tarik pynlong elekshon hynrei kumba ka paw mynta la ïohi ba ki seng sainpyrthei ha kane ka jylla Meghalaya ki dang ïohthiah lyngngai bad kim pat khih khohreh kumba long ka VPP kaba la rung sha manla ki kyndong kynshrot jong ki shnong ki thaw ban pynrung dkhot ïa ki paidbah.
U National President jong ka NPP u Conrad K. Sangma u la kren shai dang shen ba ka NPP kan pynieng beit la ki jong ki kyrtong ha ka elekshon Lok Sabha na Tura bad na Shillong Parliamentary Constituency. Wat ka BJP kaba don tang 2 ngut ki MLA ha ka Iingdorbar Thawain ka Jylla kaba 60 ngut ki dkhot ruh ka kob beit ban pynieng kyrtong na Shillong bad Tura bad ki kyntait hi ruh ban dang ïatreilang bad ki sengriewlum ban sei beit tang uwei u kyrtong monlang ha ka Elekshon Lok Sabha.
Ka jingkyntait jong ka NPP ban sei ïa u kyrtong monlang ha ka elekshon Lok Sabha mynta ka kynti ka long hadien ba kane ka party ka la sngewkhlainbor namarba ha ka elekshon MLA ba dang shu long shen ka la jop haduh 28 ngut ki MLA bad ka jingjop bun ki MLA na rilum Garo ka ai jingshngain ïa ka NPP ban ïoh bat biang ïa ka Seat ha Tura kaba la mihkhmat da ka Agatha Sangma kaba long ka MP jong ka NPP. Hynrei ha rilum Khasi, ka jingïakhun mynta kan long kaba itynnat namarba ka VPP ka ladep sei la u jong u kyrtong katba ka Congress mynta kan hap ban ïaid beit la kajong ka lynti watla u MP ba mynta jong ka Shillong Seat u dang dei hi u Bah Vincent Pala. Hato ka Congress kan dang lah neem ban ïoh biang ïa ka jingjop ha kane ka kynti na Shillong Seat? Ka jubab kan sa shai ynda ki shalyntem ka por ki la nang tyllun shwa ba ka ri India baroh kawei kan sa leit sha ka General Election jong ka Lok Sabha.
