Shillong, Lber 29: Ka lahduh jong ka samoi ba ladep, ka Mawlai SC ka la ïoh ban khur ïa ka jingjop kaba nyngkong mynta ka samoi ha ka jingïalehkai ka lympung Shillong Premier League Division 2023-24 jong ka SSA hadien ba ka la pynliem noh ïa ka Langsning FC da tang 1 kol hynnin ka Sngi Palei, ha madan SSA Ground, Polo.
Kumban shu pynkynmaw, baroh arliang, ka Langsning FC bad ka Mawlai SC shuwa ba kin jam sha kane ka jingïakhun, kim pat shym la ïoh khur jingjop, ha kaba ka Langsning ka la shah rem ha ka jingïakhun kaba nyngkong hakhmat ka Lajong katba ka Mawlai ka la ïakhaid bad ka Ryntih.
Haba phai sha ka jingïakhun hapdeng ka Langsning FC bad ka Mawlai SC, ka jingïalehkai ka long kaba mar ïaryngkatbor bad baroh arliang ki la sei la ki jong ki sap ban thawlad da kumno ban ïoh pynkhihjar bad ka Mawlai SC ka la lah ban pynurlong tang hadien 10 minit ba la ïaid ka por lyngba ka kol ba la thep da u Dajiedlang Wanshnong.
Kane ka shi kol na u Dajiedlang Wanshnong ka la ïeng skhem haduh kaba kut jong ka kylla step. Ha ka kylla miet, ka Mawlai ka la lah ban kyrshan skhem shadien ban nym ailad satia ïa ka liang pyrshah ban ïoh pynphai bad ka jingskhem jong ki bak ka la seisoh haduh kaba kut jong ka por kaba la pynïoh ïa ka Mawlai SC ban khur pura ïa ki lai point.
Katba ïa ka Langsning SC ka la mad namrem ha baroh ar sien lynter ki jingïalehkai kiba ladep jong ka mynta ka samoi jong ka lympung SPL.
