Lyngba ka Mission aikam yn bei tyngka ka sorkar ban seng kam palat 20,000 ngut ki samla ong u CM

Shillong Rymphang 10 : U Myntri Rangbah ka jylla u Conrad K Sangma ha ka sngi Thohdieng ula ïathuh ba ka sorkar jylla ka la pyntreikam da ka Mission ban kyntiew ai kam ïa ki samla da kaba ïarap ïa ki ban seng kam lajong bad ka don ka jingthmu ban bei pisa shwa sha ki 20,000 ngut ki samla ba kin sengkam lyngba ka CM-Elevate.
“Kum ka sorkar, ngi ngeit ba ka ïoh ka kot jong ka ri, ka jylla kan lah ban ïaid shakhmat lyngba ka jingseng kam lajong bad ki karkhana kiba seng da ki riewshimet” ong u Conrad haba ai jingkren ha ka PRIME MeghaPreneur Expo kaba la long ha madan Polo, Shillong.
“Ka kamram jong ka sorkar ka long ban thaw ïa kata ka rukom treikam, ban pynbiang ïa ki policy, ki lad ai jingïarap bad ki jingtei bapher bad ka rukom treikam ka ban ai mynsiem ïa ki nongseng kam lajong. Ngi don ïa ka rukom treikam kaba shai kdar, ngi la banjur halor ka jingseng kam lajong kum kata kaba buh hakhmat eh ban thaw bad ban ai ïa ki kam ki jam ha ka jylla” ula ong.
Ha ka jingaiti ïa ki cheque sha ki riewshimet kiba la seng kam lajong bad ki kynhun kiba la shah khmih bniah ban shah jied ban ïoh ïa ka pisa lyngba ka CM-Elevate, u Myntri Rangbah ula ong, “Ngi kwah ban thaw ïa ka kolshor jong ka jingseng kam lajong. Ngi kwah ba ki samla jong ngi kin shim ïa ka kabu khlem ka jingtieng bad ban shim kabu ïa ki lad kiba don hapoh jong ka jylla. Kum ka jylla ngin bteng ban rakhe ïa ka mynsiem jong ka jingseng kam lajong”.
Ula ong ba ka CM-Elevate ka dei ka prokram na ka bynta ki nongseng kam lajong bad ka dei ruh kaba la ïaid shitrhem bha hapoh ka ri bad ka sorkar ka la ai ïa ka lad ïa ki samla ba kin ai ïa kino kino ki jingtyrwa hapoh jong katei ka skhim.
“Kum ka sorkar ngin kyrshan ïa ka jingtyrwa ka ban kot haduh 75 percent ka jingai Subsidy bad ban ai jngïarap ïa ki jingdonkam, rukom pynïaid bad ka jingkyrshan na ki riewshemphang ban pynthikna ba ka kam ka jongki, kan long kaba ïaid beit bad kan seisoh” ula ong.
Nalor kane, ula pynpaw ruh ba ha ki 3-4 snem ban wan, ka sorkar kan ai jingkyrshan kumba 20,000 tam ki nongseng kam lajong kiba leh ïa ki kam khaïi bapher bapher hapoh ka jylla bad ula ong ruh ba ka sorkar kala mang ban pynlut T.300 Klur lyngba kane ka skhim.
“Ka jingthmu kaba ïar jong kane ka skhim, ka long ban pynthikna ba ki samla kin ym shaniah tang ha ki kam sorkar hynrei kin wad ruh ïa kiwei kiwei ki lad ban ïohkam ïohjam bad ka jingkyntiew ïaka jingseng kam lajong kan ïarap ha ka ban aikam aijam ha ki kam kiba pynïaid da ki riewshimet” ong u Conrad.
U Myntri Rangbah ula ai khublei ïa ka kynhun kaba nyngkong jong ki nongïoh jingïarap bad ula ong, ba kane ka dei tang ka jingsdang jong ka jingïaid lynti hynrei ha ki 3 snem ban wan yn plie lad shuh shuh ïa kiwei pat ban mih shakhmat ban sdang sengkam lajong.
Kumba 40 ngut ki nongseng kam lajong ki la ïoh ïa ka jingiarap pisa lyngba ka CM – Elevate ha ka sngi Thohdieng na ka bynta ban tei ïa ki Multipurpose Swimming Pool bad Gym, ka madan ïalaehkai Futsal bad madan ïalehkai Basketball.
Katba kiwei pat ki nongïoh jingmyntoi na kiwei ki skhim kiba dei shi bynta jong ka CM-Elevate kila ïoh ïa ka jingiarap pisa lyngba ka Meghalaya Agriculture Warehouse Scheme, Meghalaya Community Facility Centre Scheme, Prime Agriculture Response Vehicle, Meghalaya Tourism Vehicle Scheme bad ka Meghalaya Motorcaravan Scheme.