Lyngba ka kol u Damaitphang khur ka Lajong pura ïa ki lai point

Shillong, Lber 10: Hadien ka namrem ba mad pyrshah ïa ka Churchill Brothers da 2-1 kol dang shen ha ka jingïalehkai kaba la long ha Goa, ka Shillong Lajong FC ka la wanphai jingjop pat ha ka jingïakhun NorthEast Derby pyrshah ïa ka Aizawl da 2-1 kol ha ka lympung I-League kaba la long hynnin ka Sngi Saitjaiñ ha Aizawl, Mizoram.
Haba phai sha kane ka jingïakhun, lah ban kdew ba ka Lajong ka la ïakhun tyngeh naduh ba sdang ban ïoh pynkhihjar. Ka Lajong ka la ïoh shibun ki kabu ba ka la shna ha ka kylla step.
Dei ynda la jam sha ka 27 minit ba ka kynhun ka la ïoh ban lamkhmat ïa ka jingïalehkai lyngba ka kol u Phrangki Buam, bad kane ka kol ka la ïeng skhem haduh kaba kut ka kylla ba nyngkong.
Hadien ba ka jingïalehkai ka la jam sha ka extra time, na ka liang jong ka Aizawl kaba ïakhun hala ïing ka la pyrshang katba lah ban ïoh pynphai bad dei ha ka 80 ba u Lalrinzuala u la lah ban pynurlong ïa ka jingangnud ka kynhun da kaba pynïakhaid mar shi kol. Shuwa ba ka jingïalehkai kan jam sha kaba kut, u player ba mih bujli jong ka Lajong – u Damaitphang Lyngdoh u la knieh jyndat ïa ka jingkyrmen jong ka Aizawl ban ïasam mar shi point hadien ba u la khyrwit ïa ka kol ha ka 94 minit kaba la ïarap ïa ka Lajong ban khur pura ïa ki 3 point.
Wat hadien kane ka namjop, ka Lajong ka dang ïaineh ha ka kyrdan ba 6 da 29 point naki 18 sien ïakhun, bad ka duna da tang shi point ban knieh kyrdan ba san na ka Inter Kashi.
Ka Lajong kan wanphai shala ïing ban pynkhreh ïa ka jingïakhun pyrshah ïa ka Real Kashmir la Sngi Balang,
Lber 13 tarik ha ka por 7 baje janmiet ha SSA Stadium-Polo, Shillong.