Lymda dei ba mih ka VPP ka NPP ka la ïoh synshar marwei ha ka jylla: Ardent

Shillong, Lber 18: U President ka Voice of the People Party (VPP) u Bah Ardent Miller Basaïawmoit ha ka sngi Saitjaiñ u la ong ba ka jingmih ka VPP ha kane ka elekshon ba dang shu dep ka la lah ban ïada ïa ka NPP ka ka jingsynshar marwei.
Haba kren ha ka Jingïalang Sngewnguh kaba ka VPP ka la pynlong ha Madan Polo u Bah Ardent u la ong ba ka jingmih ka VPP kum ka seng saiñ pyrthei ka la pynlong ïa kiwei ki party ban tieng namar ki ïohi ba u paidbah ka jylla u phai khmat sha kane ka party.
“U President ka NPP u la pdiang ba ngi long mawjynthud ïa ki ban synshar marwei ha kane ka elekshon bad nga kwah ban ïathuh ïa phi ba ka NPP ka tieng ym ïa kiwei pat ki seng saiñ pyrthei hynrei tang ïa ka VPP namar ki ïohi ïa ka thong, ka jingthmu bad ka jingkyrshan kaba ngi ïoh na u paidbah.” ong u Bah Ardent.
U la ong ba wat la ka party ha kane ka elekshon ka la ïoh ban pynkhreh ïa kane ka elekshon tang khyndiat sngi eh amar kiba bun ki dieng pynkiang kiba la khang lynti hynrei namar ba u Blei u don ha ka liang jong ka VPP saw ngut ki kyrtong ki la shah jied kum ki nongthawaiñ.
“Baroh kita ki nongai jingkheiñ ïa ka jingjop ki party ha ka elekshon ki ai jingkheiñ ba ka VPP kan jop hapdeng 0 haduh 1 hynrei ka la jop haduh saw ngut ki MLA kaba la pynshaïong ngaiñ ïa baroh bad kane hi ka dei ka jubab jong u Blei ïa ka jingduwai jong ngi,” u la ong.
“Kumba ngi la duwai man ka por, Ah! Blei buh ïa ka VPP ha kata ka jaka ba kan long ka jingshngaiñ ïa ka jaidbynriew bad ngi lah jop wat tang saw ngut ki MLA ki paidbah ka ri ki la sngewshaiñ,” u la bynrap.
U la ong ba ha kane ka elekshon kaba dang shu dep ka VPP ka la lah ban jop ïa saw tylli kiei kiei kiba baroh ki la pyrkhat ba ka bym lah long.
“Kaba nyngkong eh ka jingjop jong ngi ka dei pyrshah ïa ka bor pisa ha kane ka elekshon ha kaba ki heh spah kiba ïakhun ki la liem bad ki kyrtong ba ïakhun na u Prah ki la lah ban jop,” u la ong.
“Ka jingjop kaba ar kaba ngi la ïoh ka dei ba tang ha kane ka shisien ïakhun elekshon ngi la lah ban jop saw ngut ki MLA bad ka jingïoh vote jong ngi ka la kynjoh sha ka kyrdan ba ka VPP kan dei ka State Party nangne sha khmat bad ba ïa u Prah ka VPP yn ym don shuh mano mano ban dang lah ban tuh,” u la bynrap.
Shuh shuh ua la ong ba ka ju ïaid ka jingïakren ba ka jingjied nongthaw aiñ jong ngi ki Khasi ka dei beit da kaba pynshong nongrim tang ïa u kyrtong bad ka party kam ju lah ban ïarap ban pynjop ne pynrem, ‘hynrei ha kane ka elekshon ngi la pynshisha ba kane ka jingong ka la kut noh namar bun ki briew kim tip ïa u kyrtong jong ngi bad kim ithuh ruh ne ïakynduh satia hynrei namar u Prah la shu kyrshan beit ïa uno uno u kyrtong ba ngi pynïakhun,’ u la ong.
“Na Nongthymmai bad Mawphlang ngim don wat tang ki Poling Agent hynrei ngi la ïoh vote haduh palat 4,000 vote,” u la bynrap.
U Bah Ardent u la ong ruh ba ka jingthmu ka VPP ban shim kum ka jaka jong ka seng riewlum ka la urlong ha kane ka kynti kaba mynta.
“Ha Sohryngkham ha ka jingïalang ba khatduh eh shuwa ban leit sha ka elekshon nga la ong ba ngin shim noh ïa ka jaka ka seng riewlum ha ka jylla bad kane ka la urlong bad kane ka dei ka jingjop kaba saw jong ngi,” u la ong.
Shuh shuh u la ong ba ka jingpynmih ïa ka VPP ka dei beit ban shakri ïa ka jaidbynriew ym na bynta ka jingmyntoi shimet jong ngi ki nongïalam.
“Ngi la lah ban saiñdur bad ban trei kum ka jingkyrmen ïa ki paidbah ka jylla khlem don satia kano kano ka thong ban myntoi shimet lyngba ka VPP bad ngi don beit tang kawei ka thong kata ka long ba ka VPP kan ïoh ban pynurlong ïa ki mat kiba ka jylla ka angnud bad ngi kyrmen skhem ba ha u 2028 u Prah un ïoh ban synshar marwei,” u la ong.
Haba ïadei bad ka jingpyrshang ki seng riewlum ban wad lynti ban thaw sorkar ban ïalam da ma ki, u Bah Ardent u la ong, “Ngi la pyrshang ban wad lad ban thaw sorkar ban ïaolam da ka seng riewlum hynrei ngi la shah shet kylla noh ha ki seng riewlum hi,” u la ong,
“Ngi don ka jinganhnud na duh ka mynsiem ban sei ïa ka sorkar ban ïalam da ka seng riewlum na kata ka daw ngi la buh 15 tylli ki kyndon ba lada thaw sorkar lang bad ka VPP hynrei namar ngi kwah sorkar seng riewlum ngi la pynjem ba lada kim lah ban pdiang ngi long kiba la kloi ban ai jingkyrshan na bar ruh khlem da don bynta lang ha ka sorkar hynrei kim pynsngap shuh ïa ngi.” u la bynrap.
U la ong ruh ba ki don ki party kiba kam ba ki don ki nongïalam kiba satar. ‘phin peit ïa ka jingkylli ki nongthoh khuor ki jubab pynban hana ba la eleit ka UDP ki shu bud lang beit,’ u la ong.
“Ngi kum ka VPP te ngin ym shu bud matlah tang ba leh kiwei ki party hynrei ngin pysnhong nia shuwa ban shim ïa kino kino ki seinjam kum ka party,” u la ong.
Ha kane ka “Jingïalang Sngewnguh” ka VPP ka la pynkup burom ïa u nongthaw ka jingrwai Kongdeng Kongnah Ha u Prah U Bah Smiling F Mylliemngap bad ïa u nongrwai kane ka jingrwai u Samla Skhem Myrboh namar da ka jingrwai jong ki ka la long ka jingïarap kaba khraw ïa ka VPP ban jop ha kane ka elekshon ong u Bah SS Rynjah u shnongknor kane ka jingïalang.
Lah ruh ban sakhi ha kane ka sngi ba ha kane ka jingïalang wat la ka don ka jingther kaba jur u slap katba dang ai jingkren u Bah Ardent hynrei la ïohi ba ki paidbah ki ieng beit triang ban sngap wat la kiba bun na ki paidbah ba wan sha kane ka jingïalang kim rah ïa kino kino ki jingkup slap.