Khur jingjop ka EGHDCA bad Ri-Bhoi DCA ha ka U-15 Inter District Cricket Tournament ka MCA

Shillong, Lber 19 : Ka East Garo Hills District Cricket Association bd ka Ri-Bhoi District Cricket Association ki la khur jingjop ha ki jingïalehkai U-15 Inter District Cricket Tournament 2023 ba pynïaid da ka Meghalaya Cricket Association (MCA) ha ka sngi Saitjaiñ.
Ka EGH ka la khur jingjop da kaba pynliem ïa ka North Garo Hills District Cricket Association da ki hynriew wicket ha ka Zone 2 ha ka jingïalehkai haWilliamnagar, katba ka Ri-Bhoi ka la pynliem da 158 ron pyrshah ïa ka Shillong Cricket Association-B ha ka Zone 1 ha ka jingïalehkai ha Umbuda.
Haba bteng biang ïa ka jingkami ba 5 ron khlem shah pynhap wicket ban beh ïa ka 40 ron jong ka North Garo Hills kaba la shah pynhap lut baroh ki wicket, ka EGH ka la shah khanglad da kaba kamai 92 ron ha kaba u Chanang Sangma u rangtied uba kamai bun ron tam da 50 na ki 53 bol. U Chingjring K Marak u khur 3 wicket ai kamai 14 ron bad u Tengrik Sangma u khur 3 wicket ai kamai 18 ron.
Ka NGH ka la lah ban ïalehkai bha ha ka liang ka tied bol ha ka inning kaba ar hynrei ka la shah pynhap lut baroh ki wicket da kaba kamai 108 ron, ha kaba 18 ron la kamai da u Henry Yoga A Sangma. U Namgrik K Sangma u khur marwei 6 wicket ai kamai 35 ron. Ka EGH ka hap ban beh ïa ka thong ba 57 ron ban jop bad ka la lah ban pyndep bad sah sa hynriew wicket ha kti. U Chanang sa shisien u la lah ban kamai bun ron tam na ka bynta ka kynhun da 19 ron (not out).
Ha kawei pat ka jingïalehkai, hashuwa ban poi katei ka sngi, ka Ri-Bhoi ka kamai 177 ron bad ka SCA-B 104 ron ha ki inning ba nyngkong. Haba sdang ïa ka inning kaba ar ha ka sngi Saitjaiñ, ka Ri-Bhoi ka la kamai 138 ron bad shah pynkhyllem lut baroh ki wicket, lyngba ka jingkamai half-century u Gaurav Narleng (62 ron na ki 56), katba u Joseph Mathew u khur 5 wicket ai kamai 28 ron.
Ka SCA-B ka la shah buh ka thong ban jop da 212 ron hynrei ka la shah pynduna kamai ron tang da 17 ron duh noh 7 wicket. U Navneet Sah, tang ma u marwei uba kamai 34 ron hynrei ka SCA-B ka la shah pynkhyllem lut baroh ki wicket da kaba kynjoh tang sha ka 53 ron. Kiba la khur wicket ki kynthup u Sanjay Sawkuta da 4 wicket ai kamai 21 ron, u Suraj Kapri 3 wicket ai kamai 14 ron bad u Benedict Jones Makdoh u ïoh 2 wicket ai kamai 9 ron.
Ha ka sngi Nyngkong na ka Zone 1 ka EJHDCA ïakhun pyrshah ïa ka WJHDCA katba ha ka Zone 2 ka jingïalehkai kan long hapdeng ka WKHDCA pyrshah ïa ka SGHDCA.