Lum u MLA ïa ki paidbah ka Ri-Bhoi ban shim jingmut halor ka jingdawa ban pynkylla ïa ka Reservation Policy

Nongpoh, Jylliew 01: U MLA ka Nongpoh u Bah Mayral Born Syiem mynta ka sngi u la lum paidbah naduh ki nongïalam shnong, ki longkmie ki longkpa, ki samla bad ki sengbhalang naka bynta ban ïasyllok bad phylliew jingmut ha kaba ïadei bad ka jingdawa ban kyrshan ïaka jingpynkylla ïaka bhah thungkam ne ka Reservation Policy haka jylla haka jingïalang kaba la long ha iing Dorbar ka Shnong Nongpoh Proper.
Ha katei ka sngi la wan ruh ban shim bynta lang da u MDC ka Nongpoh u Bah Balajied Ranee ki nongsynshar shnong bad kiwei kiwei ki riew rangbah ha kaba ïa katei ka jingïalang la pynbeit hi da u MLA ka Nongpoh ban ioh ka jingai jingmut naki paidbah kiba la mih ban kyrshan ïaka jingdawa ban pynkylla noh ïaka Reservation Policy haka jylla ha kaba bun naki paidbah kila pynpaw ba ki kyrshan bad ha kaba ïadei bad ka jingpyntreikam ïaka Roster System ym dei shuh ban phai dien ïaka naduh u snem 1972 hynrei ban bteng beit nangne shakhmat.
Haba kren sha ki lad pathai khubor naka liang u Bah Mayral Born Syiem MLA ka Nongpoh u la pynpaw ïa baroh kiba la wan ban shim bynta ha kane ka jingphylliew jingmut naduh ki longkmie ki longkpa ki nongïalam shnong, ki khun samla bad ki sengbhalang bad naka liang u MLA u don ka jingsngewkhia halor kane ha kaba naduh ki por bala dep kala don ka jingïasyllok, hynrei dang donkam shuh shuh ka jingphylliew jingmut ban ioh shuh shuh ka jingai jingmut namar ba ka jingpynkylla ïaka Reservation Policy haka jylla ka dei ka mat bad ka jingdawa kaba la slem.
Hynrei hadien ka jingkhih biang jong ka jingdawa, u MLA u la ai khublei ïa u Bah Ardent Basaiawmoit u ba la lam lynti biang ban pynim ïa kane ka mat jingdawa bad kumjuh ruh ïaka sorkar hadien ka jingïakren kiba bun ka sorkar ruh ka la don bynta ban sngap ïaka jingeh, namar kala dei hi ka por ban pynkylla lane pynthymmai tangba ha kata ka rukom ba kam dei ban noh shilliang ïa baroh ki jaitbynriew haka jylla ka jong ngi.
“Dei nakata ka daw ha kane ka sngi hadien bala ioh ban phylliew jingmut bad ki paidbah na kylleng ka Nongpoh bad ka dong Ri-Bhoi kat kiba lah ban ïapoi, la ioh ïaki jingai jingmut bapher bapher bad lyngba katei ka sngi yn rah pat bad pynsngew sha ka sorkar, namar kano kano ka rai ba dei ban shim ka dei beit ka rai jong u paidbah” la ong u Bah Mayral
U la ong ruh ba ka sur kaba nyngkong kaba la mynjur lang ha katei ka sngi ka long ban kyrshan ïaka jingpynthymmai ïaka Reservation Policy, bad ka jingthmu ba kongsan ba u MLA u lum ha katei ka sngi ka long ban ioh jingmut lada ki paidbah ki kyrshan ban pynkylla, ha kano ka dur bad ka rukom yn pynkylla ïaka? Bad naka liang u MLA u la pynpaw ba u la ioh ban lum shibun ki jingai jingmut ha katei ka sngi naki paidbah bad ngeit skhem ba ïa kitei ki jingai jingmut baroh yn sa rah sha ka sorkar.
Kum u MLA un dang bteng ruh ban leit kynduh ïaki riew paidbah namar ki dang don shibun ki bym shym la ioh ban wan ha katei ka sngi, namar kadei ka kamram jong u MLA ban leit sha ki paidbah ban shim jingmut halor katei ka bynta, namar haba ngi ïakhih kan dei beit naka bynta ka jingmyntoi jong ki paidbah ba bun ba lang kumba ka sorkar kala thaw ruh ïaka Expert Committee halor katei ka bynta bad kum u MLA un ioh ban bynrap ïaki jingai jingmut ha katei ka committee, u la bynrap.