Lum u Dy CM ïa ki heh PWD bad NHIDCL ban bishar halor ki 8 tylli ki Projek surok ba kot palat 5000 klur tyngka

Shillong, K’lyngkot 17 : U Symbud Myntri Rangbah ka tnad PWD (Roads) Bah Prestone Tynsong mynta ka sngi Thohdieng, ula lum ïa ka jingïalang ba kyrpang ba la ïadon lang naduh ki Engineer ka tnad PWD, ki heh ka NHIDCL na ka bynta ban bishar bniah halor ka jingpyntrei kam ïa ki phra tylli ki project surok ba kongsan ka Jylla, kiba la kot palat 5000 klur tyngka.
“Nga sngewtynnad ban pyntip sha phi baroh ba ka jingïaid ki kam ka long kaba biang bha namar la nang pyntrei shaid shaid ia kine ki projek” ong u Bah Prestone haba ïakren bad ki lad pathai khubor hadien ka jingïalang.
Ula ong ba “Ym pat ju don ki Sorkar ha ka histori jong ka Meghalaya naduh u snem 1972 tad haduh mynta hynrei ka dei tang kane ka Sorkar naduh u snem 2018 haduh mynta kaba la wanrah ïa kum kine ki project”.
“Kumta, ngi kwah ban pyndep lut ia baroh kine ki project kham kloi katba lah namar kin long ki jingkyrkhu kiba khraw bha ïa ki nongshongshnong bad ka Jylla” ula bynrap.
Kine ki phra tylli ki project ki kynthup ïa ka Shillong Western bypass package 1 ba (12.8 kms) T. 620 klur, package II (11.90kms) T. 686 crore bad package III (13.55 kms) T. 562 klur, Shillong Dawki Road T. 1200 klur, surok Nongstoin-Rambrai-Kyrshai (33kms) T. 359 klur, surok Dainadubi-Darugre (40kms) T. 705.83 crore, Darugre- Williamnagar (36 kms) T. 801 crore , Tura-Dalu (51kms) T. 610 crore, , Tura Bypass T 943 crore bad kumjuh ruh ïa ka High Speed Corridor na Mawlyngkhung (na Fly Over, Umiam Lake sha Panchgram ha Assam).
“ïaka High Speed Corridor Project, ïa mynta ka sorjamin bad jingïakren bad jingïapynbeit bad ki Rangbah Shnong ka dang ïaid shakhmat. Ngin sa lah ban tip ïa ka jingmang tyngka hadien bala pyndep ïa ka DPR” ula ong.
Haba pynpaw ba ka jingïoh jaka ka dei ka jingeh kaba khraw ba la mad da kine ki project surok, u Bah Prestone ula ong “75% na kane ka jingïalang bishar kam la pynlut por ban ïakren halor ka kam ïathied jaka”.
“Nga la bthah ïa baroh ki tnad ba dei khmih ba kin pynsted bad pynkloi ïa ka jingtreikam namar ngi kwah ban pyndep noh ïa kine ki project kham kloi katba lah bad kine kin long ki jingkyrkhu ïa ka Jylla Meghalaya” ula ong haba bynrap “Kumba nga ong ngi don ïa ki project kiba biang bha ha kylleng ka Jylla bad nga thikna ba hapoh kine ki khyndiat snem naduh mynta ngin sa ïohi ïa ka jingkylla ki ban sa wan hapoh ka Jylla Meghalaya”.
Haba kylli halor ka jingïaid jong ka project urok Shillong-Dawki, u Dy CM ula ong “ Ka song I,II, IV bad V nga kmen ban pyntip sha phi ba ki kam kila ïaid shaid shaid bad ba ihun hynrei ki don katto katne ki khep ba ki trai jaka ki ongem, phim lah ban leh, phi lah ban sangeh ïa ka kam namar ngam shym pat ïoh ïa ka jingsiew jong ka bai jaka”.
U pyntip ba ïa ka surok Shillong-Dawki yn sa pyndep noh hapoh u snem 2026.
“ïaka song III, ngim don satia ïa kano kano ka jingeh, ka song-III ka dei ka Pynursla Bypass bad kane ka Bypass ïa mynta, ka Sorkar India kala dep ban mynjur ïa ka DPR bad kane ruh kala wan kumba T.564 klur” bynrap u Bah Prestone.
Halor ka jingkylli ïa ka Corridor Expressway (High Speed Corrdior), u Bah Prestone ula pyntip ba kane ka surok kan poi shaduh sha Silchar bad ïa kane ka project la mang ha ka mang tyngka ba kot T.25000 klur, kynthup ïa ka jingthied jaka kaba treikam lang ha Assam bad ha Meghalaya. U pyntip ba tang ha Meghalaya la dep ban mang ym duna ïa ka T.15000 klur.
U ïathuh ba ka Sorkar India kala bthah ïa ka Jylla ban pynthikna ba kan dei ka project kaba dep bad ba trei thymmai (ka ban nym ïasoh bad ki surok ba la don lypa).