Lum ka Raid Nongkharai da ka Dorbar pyllun ba 12, shim rai ban pynneh ïa riti dustur, ka khyndew ka shyiap bad ka mei mariang

Nongpoh, Lber 26: Ban lum ban lang ïa ki nongïalam Shnong bad kumjuh ruh ki longsan ki mansan jong ka Raid na ka bynta ban ïa kren ïa ka bha ka miat jong ki Raid bad ki khun ki hajar hapoh ka Raid, ka Raid Nongkharai ha ka sngi Saitjaiñ ka la pynlong da ka Dorbar Pyllun kaba 12 ba la wan ban shim bynta naduh ki Longsan ki Masan, ki Rangbah Shnoing bad ki nongïalam Shnong na ki 15 tylli ki Shnong ba hap hapoh ka Raid Nongkharai, Khad-ar Lyngdoh, Elaka Nongpoh ha Ri Bhoi District.
Kane ka dei ka dorbar pyllun kaba la ju pynlong shisien shisnem hapoh ka Raid Nongkharai bad kane ka la dei ka kynti kaba 12 ba la pynlong ïa ka Dorbar pyllun ka raid ha ka jingïalam u Bah Moses Syngkli kum u Lyngdoh ka Raid Nongkharai.
Ha kane ka sngi nalor u Lyngdoh Raid, u Bah Moses Syngkli la wan shim bynta ruh da u Secretary ka Raid Nongkhrai, u Bah Stephan Maring, u Assistant Secretary, u Bah Vincent Makri, u Bah Albinus Tmung, longsan ka Raid bad kynthup kiwei kiwei ki longsan mansan bad ki nongïalam na ki 15 tylli ki Shnong ba hap hapoh ka jingsynshar ka Raid Nongkharai.
Lyngba kane ka Dorbar Pyllun, ki longsan ki mansan bad kumjuh ruh ki nongïalam Shnong ki la ioh lad ban ïathir ne ïatai halor shibun ki mat kiba dei shaphang ka bha ka miat jong ki khun ki hajar hapoh ka Raid.
Haba ïa kren bad ki Lad Pathai khubor hadien ka Dorbar pyllun, u Lyngdoh ka Raid Nongkharai, u Bah Moses Syngkli, u la ong ba ka Raid naduh ba la ïalam ma u kum u Lyngdoh ka la ju pynlong man la u snem ïa kane ka Dorbar pyllun bad ka thong hi ka long ban ïa thir na ïa tai shaphang ka synshar ka khadar bad ka bha ka miat jong ki khun ki hajar hapoh kane ka Raid.
U la ong ruh nalor shibun ki mat ba la ïatai ha kane ka sngi, ka Dorbar ka la ïa thir sani ruh halor ban pynneh ïa ki riti ki dustur hapoh ka Raid bad kumjuh ruh ban wan rah ïa ka shongsuk shongsaiñ ki khun ki hajar hapoh ka Raid. Na ka liang ka Dorbar ka la ïathir ruh ba ki Rangbah Shnong bad ki Nongïalam Shnong ryngkat ki longsan ki mansan ka Raid ki hap ban shim ïa kata ka jingkitkhlieh ban pynneh ïa ka shongsuk shongsaiñ ki khun ki hajar bad ha kajuh ka por ruh ka Dorbar ka la ban khia ruh ba ha ki 15 tylli ki Shnong ba hap ha ka Raid Nongkharai la btah ïa ki nongïalam shnong ba kin khnang ban die jaka ïa ki briew kiba na shabar ka Raid bad kane ka long shi bynta ban pynneh pynsah ïa ki khyndew ki shyiap hapoh ka Raid, u la bynrap.
U la ong ruh ba ki khun ki hajar man la u snem ki dang roi na ka por sha ka por bad ka jingdon ka khyndew ka shyiap pat ka sah kumjuh bad lada ailad noh ban die ïa ki khyndew ki shyiap sha kiwei kiba nabar shaei pat ki khun ki hajar kin shong kin sah hapoh ka Raid bad la leh khnang ïa kane ka ruh ba ka Raid kam khang ban die shabar hynrei shuwa ba ki thmu ban die jaka ki hap ban tyrwa shuwa tang ïa ki briew kiba hapoh jong ka Raid, u la bynrap.
Shuh shuh, u la pyntip ruh nalor ba la ïathir ïa ki kam kiba long na ka bynta ka bha ka miat jong ki khun ki hajar hapoh ka Raid bad ban pynneh pynsah ïa ka riti ka dustur, ka Dorbar Pyllung ka la shim rai ruh ba baroh ki Dorbar shnong kin ïa trei ryngkat ban ïada ïa ka mariang bad ba khanglad na ka jingpyniap dusmon ïa ki mrad ki mreng ba kynthup naduh ka jingwih dawai ha ki wah, ka jingpyniap ïa ki mrad bapher bapher bad kumjuh ruh ban thang khlaw ba kane ka ïalam ym tang ban pynjot ïa ka mariang bad ka pynduhjaid ruh ïa baroh ki kynja mrad kiba im la ki dei kiba im ha ki um ne ha ki ryngkew, u la bynrap shuh shuh.