Shillong, Lber, 14: Ka dorbarbah baar jong ka Kur Pyngrope kaba la long ha ka sngi Saitjaiñ ha shnong Tynring, East Khasi Hills District ka la long kaba shongkun da ka jingïashim bynta jong ki longkmie, ki longkpa bad ki khun samla na kylleng ki shnong jong ka riLum Khasi bad Jaiñtia.
Ha kane ka dorbarbah, la pynshongkun ruh da ki jingrwai ki jingshad na ki khun samla bad ki heprit kiba dei na ki shnat treikam bapher bapher jong kane ka Kur.
La plie ïa kane ka dorbarbah da kaba pynher ïa ka lama kur da u Myntri jong ka Kur Pyngrope ha ka Hima Khyrim u Bah Primose Pyngrope ha ka jingïadonlang jong u Basan ka Hima Mylliem u Bah Melding Pyngrope.
Nalor kiwei pat ki jingkren ha kane ka dorbarbah, la ïoh ïa ki kyntien kyntu kynpham khamtam sha ki khun samla jong ka kur da ka Kong Sohlin Pyngrope na Tynring Unit bad u Bah Bhimsing Pyngrope uba long u President jong ka Pynursla Unit kumjuh ki kyntien ai jingmut ka Kur da ka Kong Elizabeth Pyngrope.
Ha kane ka sngi, ki nongkitkam ba hakhmat jong ka Kur ki la ai ïa ki kaiphod treikam jong ka Central Executive Committee da u Secretary bad Finance Secretary ha shwa ki jingkren na u Bah Bajop Pyngrope, MDC ka Rambrai-Jyrngam, u Bah Primose u Bah Melding, u Bah Bansharai nalor kiwei pat.
La ai sngewbha ruh sha ki longkmie tymmen jong ka kur kiba dei na ka shnong Tynring bad la jingsam khusnam sha ki khun samla jong ka Kur kiba la pas bha bad kiba la wan sha khmat ha ki kyrdan jingpule.
Ka Dorbar ba lai jong ka Kur kan sa long ha Sohryngkham ha u snem 2023 ha kaba la aiti ïa ka lama jong ka kur da ka Tynring Unit sha ka Sohryngkham Unit.
