Ka sorkar ka dei ban pynshitom ïa kiba donkti ha ki karkhana thang dewiong beaiï : HC
Shillong, Lber 13 : Ka ïing bishar High Court jongka jylla ka la bthah ïa ka sorkar jylla ban pynshitom kat kum ki kyndon aiñ ïa kito kiba donkti bad ki karkhana thang dewiong beaiñ ne Coke Factory.
“ Lada ïa kita kiba donkti la ithuh shai kdar, kan long kaba biang eh lada ka sorkar kan pynshitom ïa ki kat kum ki kyndon aiñ” ong ka hukum jongka ïing bishar ba la khlieh da u Chief Justice Sanjib Banerjee hadien ba la shong bishar halor ka mukot duma PIL ba la ujor da u Shailendra Kumar Sharma.
DSGI Dr Mozika u la pyntip sha ka ïing bishar hadien ba la pynmih ïa ka hukum ban khang lut ïa baroh kine ki karkhana thang dewiong beaiñ, kito ki briew kiba ïadonkti ki lah ban iehnoh ïa kiba bun ki karkhana bad la shu shimti ban pynïaid malu mala lehse da ki trai shnong ne ki nongtrei. La ai jingmut ba lada la ithuh ïa kita kiba donkti ban seng ïakine ki karkhana beaiñ kam long kaba eh satia ban leh ïa kaba donkam,
Na ka liang u Advocate General u la pyntip ba ka sorkar jylla ka la ai jingtip sha ka kynhun ba tohkit ban thwet jur ban lap ïa kita ki briew kiba donkti bad kine ki karkhana thang dewiong khnang ban pynshitom ïa ki kat kum ka aiñ. ïa kiwei kiwei ki kyndon ban pynngat ïa ki ruh la dep kynthup lang ha ka FIR.
Na ka liang ka sorkar ka la dep pynpaw ruh ba kam don kano kano ka jingeh ban khang khyrdep ïa kita ki karkhana thang dewiong beaiñ ha ka jylla namar lada kino kino ki karkhana kiba ym don ki kot ki sla ne ïoh ïa ka license ne kiba la ïoh bor ban pyntrei bad pyni naei u dewiong u wan kim lah ban treikam namar ki hap ban don lut nadong shadong.
Na ka liang ka sorkar ka la ai jingmut ruh ban aiti ïa kane ka kam ruh ban peit da u Justice Katakey.
Ka ïingbishar ka la shah ruh ïa u nongmudui ban ïa kynduh bad ïakren hi bad u Justice Katakey uba la thung ban peit ïa ka jingpyntreikam ïa ki hukum ka NGT bad Supreme Court ha kaba ïadei bad ka jingtih bad khaïi dewiong beaiñ ha ka jylla namar kane ka kam karkhana thang dewiong beaiñ ruh ka ïasyriem kumjuh hi.
Kino kino ki kam kiba ïadei bad ki karkhana thang dewiong beaiñ lah ban kynthup lang ha ki kaiphod ba la ai da u Justice Katakey na ka por sha ka por.
Ka ïing bishar ka la buh ban shong bishar biang ïa kane ka mukotduma ha ka 9 tarik Jymmang 2023.