Nongstoiñ, Lber 24: Ka West Khasi Students Union sengkmie ka la leit ban ïakynduh ïa u Deputy Commissioner jong ka West Khasi Hills, ha kaba ïadei bad ki mat jong ka roi ka san, ki kam sahteng ha ka District, kynthup ïa ka Polytechnic, ITI, District Jail ka District Library bad Auditorium bad ka MCH.
Ha kaba ïadei bad kitei ki mat jingdawa, ka seng ka la pynkynmaw ïa u khlieh nongsynshar jong ka District ba un ïai buddien ïa kitei ki mat kiba sahteng la slem bha, kiba dei ki mat na ka bynta ki jingmyntoi jong ki paidbah khamtam ïa ki samla pule jong ka thaiñ.
Ha ka jingïakren bad u DC Nongstoiñ, u la pynpaw ba na ka liang jong u, u la shimkhia ban thoh sha ki bor ba halor ban pynstet bad pynurlong ïa kitei ki mat kiba long ka jingmyntoi u paidbah jong ka thaiñ.
U la ong ruh na ka liang jong u, u khlem shongkli kti ha kaba u la khot na ka por sha ka por ïa ki ophisar kiba dei peit ha ki tnad treikam, ban peit ba ki mat ka roi ka san ha la ki jong ki tnad treikam, ba kim dei ban sahteng hynrei ki dei ban treikam shait shait.
Na ka liang ka seng lyngba u Bah D.Sun kan sa nang buddien ïa kitei ki mat jingdawa ym tang na u DC jong ka thaiñ. Hynrei kan sah rah haduh ki bor ba halor jong ki tnad ba ha khlieh duh jong ka jylla, khnang ba kin lah ban pynbiang ne mang ban pynurlong khlem ki jingpynsah teng ïa ka roi ka san sha ka thaiñ West Khasi Hills.
