Na ka tnat Revenue, leit buddien ka HFU ban pyllait kham kloi ïa ki jingïarap sha ki nongrep

Mawkyrwat, Lber 24: Ka seng jong ki nongrep kaba la tip kum ka ‘Hills Farmers Union’ (HFU) da ka jingsngewkhia na ka bynta ki nongrep ka la leit ïakynduh ïa ki heh ophisar ka tnat Revenue jong ka tnad ophis jong ka kam-rep kam-riang ha Shillong ban ïakren halor kane ka mat ba ïadei bad ki nongrep ha kaba ki la lap ruh ba ki don ki nongrep ki bym pat ïoh ïa ki jingïarap wat hadien ka jingïaid lynti la lai snem eiei.
Lah ban kdew ba kane ka jingleit ïakynduh jong ki nongïalam ka HFU ka dei hadien ka jingud jingnam jong ki nongrep halor ka jingpynslem jong ka Sorkar Jylla ban pyllait ïa ki lad jingïarap ne ka relief sha ki nongrep kiba la shah pynjot noh ïa ki lyngkha rep bad kumjuh ki jingthung jingtep ha ki bor jong ka mariang.
U Bah Commander Shangpliang uba dei u President ka Hills Farmers Union (HFU) Central Body, haba kren ha ki lad pathai khubor, u la ong ba hadien ka jingïakren bad ïamir jingmut bad ki heh ophisar ka tnad ophis jong ka kam-rep kam-riang la sngewthuh ba ki don shibun ki bynta ba ka sorkar ka hap ban pynbiang khamtam eh ha kaba ïadei bad ki kot ki sla ban ïaid katkum ka rukom ba dei ban leh, bad kumjuh ruh ba ka donkam ïa ka jingmynjur jong ka State Executive Committee (SEC) ha shwa ban phah sha ki Deputy Commissioner jong ki distrik ba kin pyllait ïa ka pisa sha kiba dei hok ban ïoh ki lad jingïarap.
Namarkata, ka Hills Farmers Union (HFU) lyngba u President ka kyntu ïa ka sorkar ba kan pynkloi ban pynbiang ïa ki kot ki sla katkum ka jingdonkam ka ophis bad kumjuh ïa ka SEC ne ka State Executive Committee ba ka dei ban shong wut wut khnang ba yn lah ban pyllait noh kham kloi ïa ki jingïarap sha ki nongrep ha kylleng ka Jylla khnang ba kane kan long shisha ka jingïarap ïa ki nongrep ba la shah ktah ha ki bor ka mariang ha ki snem ba la leit noh.