Nongstoiñ, Naiwieng 7: Ka Hynñiewtrep Youth’s Council (HYC) Lai Lyngdoh Circle, ha ka sngi saitjaiñ ka la hiar ha ka Shnong Mynni Mawbri, West Khasi Hills District ban ïarap ïa ka ïing ka kong Kyntiewfully Kharbani kaba la pluh ha ka 3 tarik mynta hi u bnai ha ka por kumba 11:30 mynstep
Ha kane ka jingleit ïarap la ïoh ban pynlong duwai bad ka jinglang lyngkot ban pyntngen ïa ka ïing ka sem kaba la mad ïakane ka apot. La pynïaid ïa ka jingïalang da u Samla Karnes Sohshang Vice Presidents HYC Lai Lyngdoh Circle, la ïoh jingduwai na u Samla Primal Thongni dkhot HYC Nongklung unit.
La ïoh ka jingkren lyngkot na u Samla Wandapynkmen Marweiñ President HYC Lai Lyngdoh Circle, u la ong, “Ka seng kam lah ban ïarap da ka bor bah, hynrei da kaba rit ngi pynpaw ban donlang bad phi hapdeng kine hynrei wat khuslai u Blei un ïarap ïa phi”.
U Samla Lumlang Kharsyiemlieh President HYC West Khasi Hills District, u la on, “Ngi wan hangne ban pynpaw ka dak kaba rit ban ïadonlang bad ki parathaiñ paradoh parasnam ha ka shitom ka shipa. Ka election ka la jan lehse don kiwei kiba wan ïarap ïa phi kiba khmih lynti ban ïoh eiei kylliang na phi. Hynrei ka seng HYC ka wan ban ïarap naduh mynsiem ym ban ap ei ei na phi”.
“Ngi wan ban kitbok ïa phi, ban ai mynsiem ïa phi bad ban duwai lem na ka bynta jong phi, kumba ka ktien u Blei ka ong ‘suk kiba duk ha ka mynsiem na ba jong ki long ka hima ki bneng’. Kane ka pynpaw ba u Blei tip ïa ngi watla ka long kumne, u ïohi phi la jynjar hynrei phi phai ha u Blei ka mut phi duk ha ka Pyrthei phi jan ja U Blei. Ngi ka seng ngi kitbok ïa phi phin ïoh bun ki jingkyrkhu ba kham bun shah”.
Na ka liang u Samla Lumlang President ryngkat ki dkhot ka HYC Lai Lyngdoh Circle, ki la aiti ïa ki ki tiar bam, ki tiar pyndonkam ha ïing bad ka pisa ba la synïang da ki dkhot ka seng HYC .
Naka liang ka kong Kyntiewfully Kharbani ka la pynpaw ka jingsngewnguh da kaba ong ba phi ong kiba rit hynrei kine ha nga bad ka ïing ki dei kiba khraw eh. Ha katei ka sngi la donlang ki Riew rangbah kum u Secretary Shnong Mynni Mawbri bad ki dkhot kylleng kylleng ka Circle.
