Leit pyndem u Dribar Trok hakhmat ki Pulit ka Byrnihat, hadien ba tynrah ïa u Rangbah

Nongpoh, Jylliew 29: Uwei na u Dribar Trok u la la hap ban leit pyndem hakhmat ki Pulit ka Byrnihat, kaba dei hadien ba u la leit ban tynrah ïa uwei u rangbah ha 13mer, Byrnihat ba hap ha ka surokbah National Highway-6 ha Ri Bhoi, ha haduh ba u la duh syndon ïa la ka jingim.
Kane ka jingjia ka la jia ha ka janmiet jong ka sngi Baar, kata ha ka por 9 baje ei, ha kaba uwei u Dribar Trok ba la tip kyrteng kum u Thomborborlang Phawa, ha ka rta kaba 33 snem bad uba niah ïa ka Trok kaba don ïa u number AS 01-KC- 9095 u la leit ban tynrah ïa uwei u rangbah haduh ba u la duh noh ïa ka jingim.
Un u rangbah ba la khlad noh da ka jingshah tynrah ha katei ka trok la tip kyrteng kum u Higlusbor Momin, 45 snem ka rta, uba shong basah ha Ampher, 12mer bad kumba la ioh lum jingtip la rah noh ïa u mar mar sha PHC Byrnihat bad hadien ba la poi ha katei ka jaka ai jingsumar, ki Doctor ki la pynbna ba u la dep ban khlad noh.
Kumba la pynpaw da kiba la iohi kane ka jingjia, la ong ba katei ka Trok ba thylli ka dang mih na ka Kudam Cement ban kiew sha Shillong, hynrei kynsan ka la leit ban tynrah ïa utei u rangbah, uba la duh noh ïa la ka jingim, ha katei ka jaka.
Shuh shuh, katkum ka tyllong khubor ba la ioh lum, la ong ba utei u Dribar uba la phet na katei ka jaka, hadien u la leit hi ban pyndem hakhmat ki bor Pulit ka Byrnihat bad na ka liang ki bor pulit ruh ki dang pynlong ïa ka jingtohkit kaba bniah halor kane ka jingjia.