Mawkyrwat, Rymphang, 04: Ka People’s Democratic Front (PDF) jong ka Zonal Committee Mawkyrwat Block mynta ka kynti ka la shim ïa ka rai ban nym pynïeng la u jong u kyrtong hynrei ban leit pat ban kyrshan ïa kiwei ki party bad ïa ka rai ki la dep ban shim ryngkat ka jingïasngewthuh jingmut lang baroh ki nongkyrshan jong ka.
Lah ban kdew ba shi bnai duna shwa ba ka jingjied (election) ïa ki nongmihkhmat sha Ïingdorbar Thaw-aiñ ka Jylla ka ban long ha ka 27 tarik u Rymphang, 2023, ka People’s Democratic Front (PDF) jong ka Zonal Committee Mawkyrwat Block ka la leit ban ai jingkyrshan ïa u kyrtong ka United Democratic Party (UDP) na ka 36 -Mawkyrwat Constituency kata ïa u bah Renikton L. Tongkhar.
Ïa kane ka kynhun jong ki nongkyrshan ka People’s Democratic Front (PDF) Zonal Committee Mawkyrwat Block ka dei hapoh ka jingïalam jong u President ka PDF, South West Khasi Hills District, u bah Kyntiew Nongsiej bad u President jong ka Zonal Committee Mawkyrwat Block, u bah Maiantis Lyngkhoi ha kaba ïa ki la dep ban pdiang sngewbha da u bah Renikton Lyngdoh Tongkhar ha ka jingïalang ba la pynlong ha phyllaw ka ophis treikam jong ka UDP ha Mawkyrwat ha kaba la sakhi lang da ki rangbah nongïalam jong ka UDP naduh u President, u bah Shaiñkor Nongsiej lem bad kiwei kiwei ki ‘riew rangbah.
