Leit kynduh DC ka Dorbar ki Waheh Kur ka Ri Jaiñtia halor ka rukom ai Scheduled Tribe

Jowai, Naitung, 16: Ki nongïalam jong ka Dorbar ki Waheh Kur ka Ri Jaiñtia haka jinglam khmat u President ma Khroo L Pariat lem bad ki Dkhot, mynta ka sngi 16 tarik u Naitung kila leit ban kynduh ïa u bah B. S. Sohliya, IAS Deputy Commissioner, West Jaiñtia Hills District.
Ha kane ka jingleit kynduh ka Dorbar ki Waheh Kur, Ri Jaiñtia kila ïoh lad ban aiti ïaka dorkhas ban kyrpad ïa u DC ban ïatreilang bad ki Dorbar Kur ha kaba ïadei bad ka jingai Scheduled Tribe Certificate sha ki Pnar/Jaiñtia, khnang ban lait na kano kano ka jingkynrum kynram hadien.
Shuh shuh ha katei ka dorkhas la kyrpad ïa u Deputy Commissioner ban pynsangeh noh shi syndon ban ai Scheduled Tribe Certificate sha kino kino ki briew kiba thmu ban pynsniew ïa ka Jait ka kynja na ka kmie, kata da kaba shim kur na ka kmie u kpa lane na ka jait u shynrang namar kane ka long pyrshah ïa ka longbriew manbriew jong ka jait ka kynja.
Ka Dorbar Ki Waheh Kur, Ri Jaiñtia kala shimkhia bha ïa kane ka kam namar ka long kaba donkam eh ha kum kane ka juk ba mynta, namar ka rukom ïoh Scheduled Tribe jong ki briew mynta kala pynartatien bad kala buh ha ka jingeh kaba khraw ïa ka Ri Jaiñtia kumjuh ïa ka jait bynriew kaba shim jait na ka kmie.
Halor kane na ka liang u B. S. Sohliya, IAS Deputy Commissioner haka jingdonlang ka Kong B. Blah MCS, ka Additional Deputy Commissioner ka West Jaiñtia Hills, kila sngewdei ban ïatreilang halor kane ka jingkyrpad ka Dorbar ki Waheh Kur Ri Jaiñtia.
Ha kajuh ka por kum ka Dorbar ka khmih lynti ba ka JHADC kaba la pynkup bor da ka Six schedule jong ka riti treikam ka ri India, kan pynkloi noh ban ithuh ïa ki kyrteng jong ki kur bad ki Waheh Kur Dorbar Kur kiba dei ban ïoh ïaka Schedule Tribe, khnang ba yn lah ban pynbha shuh shuh ïa ka rukom ai Scheduled Tribe na ka ophis u DC ha baroh ar tylli ki District ha Jaiñtia Hills.