Shillong, Nohprah 13 : U MLA ka South Shillong Constituency u Bah Sanbor Shullai mynta ka sngi Baar, ula leit jurip ïa ka jaka ban tei ïa ka Urban Primary Health Centre (UPHC) kaba 10 jingthiah ha ka jinglut jingsep kaba kot 4. 99 klur tyngka ha Lumparing.
Haba ai jingkren ha ka jingïalang, u Bah Sanbor Shullai ula ai khublei ïa ka Dorbar Shnong kaba la ai ei ïa ka jaka ban tei ïa ka Urban Urban Primary Health Center na ka bynta ka jingmyntoi jong ki nongshong shnong katei ka thaiñ ba kin ïoh ïa ka jingsumar haba ki pang ki shitom.
Ula ong, ba ki kam ki jam ki la sdang ban ïaid shakhmat na ka bynta ban tei ïa ka kane ka jaka sumar ha ka jinglut jingsep kaba kot 4 .99 klur ïa kaba la mang da ka Tnad ka Koit ka Khiah jong ka sorkar jylla.
U MLA ula ong, ba la ai por 30 bnai ïa u kontraktor ban tei pyndep ïa katei ka jaka sumar kaba don ruh 10 jingthiah ban ai jingsumar ïa ki nongpang khnang ba kan long ka jingkyrkhu ïa ki paidbah kiba sah ha katei ka thaiñ bad haka constituency hi baroh kawei.
Na ka liang ki nongïalam shnong kiba la ai jingkren ki la pynpaw ïa ka jingsngewnguh ïa u MLA uba la shimkhia ban wanrah ïa ki kam pynroi bapher ha ka constituency na ka bynta ka bit ka biang jong u paidbah.
Ha katei ka jingjurip la ïadon lang ka DMHO Dr S.Lyngdoh, u Rangbah Shnong ka Lower Lumparing u Bah Doncaster Shabong, u Rangbah Shnong ka Upper Lumparing u Bah HB Wahlang, u Rangbah Shnong ka Riat Laban Kynjat Phutbol Bah Shaiphar Wahlang bad kiwei kiwei.
