Shillong, Nohprah, 13: U Myntri Rangbah ka Jylla, u Conrad Kongkal Sangma ha ka sngi Balang u la ong ba ka Sorkar Jylla ka dang bishar bniah shwa ban pynkha ïa ki Police Station ba thymmai.
Ha ka jingïakren bad ki lad pathai khubor, u Sangma u la ong, “ngi dang bishar ïa kine ki bynta namarba ki bun bha kiba dawa ïa ka Police Station ha baroh kawei ka jylla bad nga ruh nga dei uwei uba pynpaw ïa ka jingsngew ba ngi dei ban pynkhlaiñ ïa ki Police Station kiba la don lypa bad ban pyntreikam shispah na ka shispah bad ban bishar bniah shwa ban ïaid shakhmat.”
“Kumba phi la ïohi, ngi don kumba 2000 tylli ki jingthungkam bad ka jingpyndap ïa ki kam ba lait na ki Police Stations bad Out Post ha ki bynta bapher bapher jong ka jylla bad ka thong jong nga ka long ban pyndep shwa ïa kata,” u la ong.
Shuh shuh u la ong, “ka thong banyngkong bad kaba hakhmat eh ka long ban pynbiang shwa ïa ka jingdon jong ki nongtrei, ka jingpynbiang ïa ki tiar ki tar, ki kali, ki tiar siat, ki jinghikai pyntbit bad baroh ki jingdonkam nadong shadong bad ynda kine ki la biang pura ngin sa lah ban pynkha shuh shuh ïa ki Police Station.”
