Shillong,Naitung 3 : Mynta ka sngi u MLA jongka Mawkynrew Constituency u bah Banteidor Lyngdoh ryngkat u SDO ka PWD, u Sordar ka Raid Rngi bah Tyngkai Mynsong, ki bor synshar shnong lem bad ki riew paidbah ki la leit ban jurip ïa ka surok Khapmaw kaba la shah pynjulor jur ha u lapbah lapsan mynta u snem bad kaba la ktah ïa ka leit ka wan jong ki paid nongshnong shnong.
Ha katei ka jingleit jurip la shim ïa ka rai ban sdang pyntrei noh ïaka surok mar mar tang shu rang u slap khnang ba ki paidbah kin suk biang ka leit ka wan lyngba katei ka surok. Hooid ïa kane ka surok la dep shna teng mynshwa da kaba shna ruh da ka surok plastic hynrei namar ba jur palat u slap kumta la jur ki jingtwa bad jingpynjulor ïa kane ka surok. Ki don haduh lai bad saw tylli ki jaka kiba la jur ka jingshah pynjulor bad kaba kham jur eh ka dei ha ka jaka ban poi artat sha shnong Khapmaw.
Kum u MLA uba kit ba bah ïa ka khia ka shon ki paidbah mar ïa ïoh jingtip halor ka jingtwa bad shah pynjulor katei ka surok mar mar u la khot ïa ki engineer jongka PWD ban leit jurip lang khnang ban ïoh shna noh ïa ka surok tang shu la rang u slap.
Ym tang katei ka surok hynrei kane ka jingther u lapbah mynta u snem ka la wanrah ruh ka jingtwa ha kiwei kiwei ki surok kum ha ka surok Lynshing sha Mawlat, ka surok Nohron bad kiwei kiwei ki surok hapoh ka Mawkynrew Constituency bad ki trai shnong ki la ïathuh tang shu ïoh jingtip u MLA u la phah mar mar ïa ka JCB bad ïa ki briew ban pynkhuid ïa ka jingtwa bad mynta ki kali ki la lait ban ïaid biang ha kitei ki surok.
Nalor kane la ïoh jingtip ba u MLA u la leit ïakren ruh bad ki bor bahalor duh jongka sorkar na ka bynta ban mang pisa ban ïoh pynbha lut ïa baroh ki surok kiba la shah pynjulor ha u lapbah ha ka Mawkynrew Constituency bad na ka liang ki bor bahalor ruh ki la sngewkhia bad kular ba yn sa mang pisa ban phah pynbha ïa ki surok hapoh ka constituency tang shu la ailad ka bneng ne ynda la rang u slap.
