Nongpoh, Rymphang 10: U Bah Paul Lyngdoh Myntri ka tnad jngohkai pyrthei ryngkat u MLA ka Nongpoh Bah Mayral Born Syiem haka jingdonlang u Bah Cyril Diengdoh Director ka tnad Tourism mynta ka sngi kila leit ban iuhkjat bad leit jngoh ïaka Pnah kyndeng kaba dei ka law kyntang haka shnong Pahamskhen ha Ri-Bhoi ban leit peit bad sakhi ruh ïaka jingdon jong ka krem lymbit ha katei ka jaka.
Katei ka jingleit ban sakhi ïakatei ka lawkyntang bad ka krem lymbit ka dei ruh hadien ka jingpynbeit jong ka RBTEDF ban pynlong ka jingïaid kjat sha katei ka jaka ban pynpaw pyrthei kum kawei naki jaka jngohkai pyrthei kaba itynnad kaba don ruh ki khanatang naduh u mynbarim haka por ba ka Kur Makri ka dang pynlong ka kñia ka khriam ha katei ka jaka.
Kum ka Raid Nonglyngdoh bad RBTEDF kala buh ruh shibun ki jingdonkam ba hakhmat eh ban pynbha ïa katei ka jaka naduh ka surok, ka umbam ka umdih, ka jaka shongkai ki nongwan jngohkai pyrthei bad kiwei kiwei bala pynsngew ruh hakhmat u myntri.
Haba kren ha katei ka sngi naka liang u Bah Paul Lyngdoh kum u myntri sorkar ba dei peit ïaka kam jngohkai pyrthei haka jylla u la ai ka jingïaroh ïa katei ka jaka halor ka jingriewspah ba ka mei mariang kala theh bad ka Ri-Bhoi District ka dei shisha ka jaka kaba la kyrkhu da u Blei kumba kala don ruh ka jingong ba kat ba bet u symbai ha them seisoh jong ka Ri-Bhoi, u met bad u soh.
U la ong ruh ba ka kam jngohkai pyrthei kala dei shisha ka karkhana aikam aijam bad kyntiew ïaka ioh ka kot ki paidbah ha kane ka juk ba mynta, bad kum ki paidbah kim dei ban phaikhmat tang sha ki kam sorkar hynrei ka spah ka don kyrhai lada ki paidbah ki nang ban pyndonkam ïaka.
Ha kaba ïadei bad ka jingdawa ban pynbha ïa katei ka jaka, naka liang u Bah Paul Lyngdoh u la kular ban shimkhia ïa katei ka kam khamtam ki jingdonkam hakhmat eh kum u surok, ki jaka shongkai ha kaba u la bthah ruh ïa u District Tourism Officer ka Ri-Bhoi District ban leh ïaka jingsorjamin ïaka jaka bad kaei kaba yn lah ban leh ban pynbha ïa katei ka jaka naka bynta ban kyntiew ïaka kam jngohkai pyrthei ha katei ka jaka.
Ha katei ka sngi la sakhi ruh da ka jingdonlang u Bah Bansynsharlang Nongkynrih District Tourist Officer ka Ri-Bhoi District, u Bah Plielad Tiewsoh Chairman ka RBTEDF, Bah Sensy Lyngdoh, Lyngdoh ka Raid Nonglyngdoh, ki longsan mansan bad ki riew rangbah naka Raid bad ki shnong ba marjan katei ka lawkyntang.
