Shillong, ïaïong, 21: Ka ‘Institute of Bioresources and Sustainable Develop-ment’ (IBSD), kaba don ha Upper Shillong ha Meghalaya mynta ka sngi kala pdiang ïa ki samla pule jong ka St. Edmund’s College bad ïa ki nonghikai kiba la leit ban jngoh ïa ka Laboratory katei ka jaka.
Kane ka jingleit jong ki samla pule ka St. Edmund sha katei ka jaka ka long ban sngewthuh ïa ka jingtrei kam ka Laboratory bad ki kor ki bor kiba don ha katei ka jaka ba jurip bniah kyrpang ïa ki dawai kynbat kane ka thaiñ.
Ha kane ka jingleit ki samla pule ka St. Edmund la pynsngewthuh ïa ki da u Director ka IBSD, Prof. Pulok K. Mukherjee ba kumno ban pynkiew ïa ka jingïadei ka stad saïan bad ki kor ki bor jong kane ka juk kaba mynta ban pyndon kam ïa ki na ka bynta ban ïada ïa ka mariang.
Ka IBSD ka juh pynlong ïa kum kine ki jingïakynduhlang ban pynsngewthuh ïa ki samla pule ba kin wat bniah ha kaba ïa dei bad ka mariang bad khamtam eh bad ki jingthung kiba mih na ka mariang ha kane ka jylla.
