Shillong, Nohprah 13: U Symbud Myntri Rangbah ka Jylla u Ma Sniawbhalang Dhar uba khmih ruh ïa ka tnad Urban Affairs mynta ka sngi Balang, ula leit ban bud dien ïa ka jingtei thymmai ïa ka ïew Laitumkhrah bad ha kane ka jingleit u la lap ba ka jingtrei ka la ïaid shaid shaid bad la khmih lynti ba yn lah ban pyndep ïa kane ka ïew ha u Rymphang jong u snem ban wan.
Ha kane ka sngi la wan synran lang da ka Myntri ka tnat ka koit ka khiah ka Kong Ampareen Lyngdoh kaba dei ruh ka MLA jong ka East Shillong constituency, ha kaba la ïadon lang ki heh ophisar naka tnad Urban Affairs bad na ka Shillong Smart City Project.
Haba kren sha ki lad pathai khubor u Ma Sniawbhalang ula pyntip ba la mang 38 Klur tyngka ban tei ïa ka ïew thymmai ha Laitumkhrah bad ka thong ka dei ban pyndep ha ka taiew ba khatduh jong u bnai Rymphang 2024.
U Bah Sniawbhalang ula ïathuh ba u dap da ka jingkmen ban ïohi ba ka jingpyntrei ïa ki kam ki ïaid beit ïaid ryntih.
“Watla ki kam ki ïaid beit ïaid ryntih bad ha ka por kaba biang hynrei namar ka khlam COVID-19 ka la don ka jingshah pynsangeh teng ha ki snem bala dep hynrei ka Sorkar ka buh ïa ka thong ban pyndep noh hapoh ka taiew ba khatduh u bnai Rymphang 2024” la ong u Ma Sniawbhalang.
Ula pyntip ba katkum ka Detail Project Report (DPR) kin don 183 tylli ki dukan bad ka jaka ïeng kali na ka bynta 100 tylli ki kali hapoh ka ïew thymmai ha Laitumkhrah.
Na ka Liang ka Kong Ampareen Lyngdoh ka la pynpaw ka jingsngewkmen kaba khraw halor kane ka jingwan bud dien u Symbud Myntri Rangbah ïa kane ka jingtei ïa kane ka ïew.
Ka la ong kane ka projek kan dei kawei na ki projek ban sah kynmaw ym tang ha kane ka pateng ba mynta hynrei wat ha ka pateng ban wan ruh. “ Kane ka dei ka burom bad ka nam jong i pa jong nga i (L) Peter Garnette Marbaniang”.
Kane ka ïew kan don jaka ruh na ka bynta ki nongdie madan bad ki jaka ïeng kali kiba biang. Ki ban ïoh jingmyntoi nyngkong eh na kane ka ïew kin long ki briew jongka Laitumkhrah hi khamtam ïa ki khun samla kiba don ka sap ha ka khaïi pateng.
