Leit aiti u MLA bad u DC ka West Khasi Hills ryngkat ka jingsngewlem sha ki bahaïing

Nongstoiñ, Jylliew, 25: Hadien kumba shi taiew ei ei ba I Cafinia Nongsiej bad I Maïanylla Nongsiej na ka shnong Mawlangniang ki la khlad noh na ka jingjia twa khyndew ha Mawiong Pyndengrei, na ka liang ka sorkar ka la pyllait ïa ka jingïarap kaba phra lak tyngka sha kane ka longïing lyngba ka State Disaster Relief Fund.
Kane baroh ka dei namar ka jingleh shitom jong u MLA u ba long ruh u MDC jong ka Nongstoiñ Bah Gabriel Wahlang. Kumjuh ruh ryngkat ka jingïatreilang jong u Deputy Commis-sioner ka West Khasi Hills District Bah Garod LSN Dykes.
Ïa kane ka pisa yn pynrung ha ka Account jong kiba haïing hasem bad ïa ki kot ki sla jingdonkam, la leit ban aiti da u Bah Gabriel Wahlang bad DC Nongstoiñ ha ka sngi saitjaiñ, ha kaba la donlang ruh da kiba haïing hasem, ki Tymmen basan bad rangbah balang jong ka Balang Presbyterian Maw-langniang.
Ha kane ka sngi la pynlong ruh ïa ka jingïaseng duwai ba la pynïaid da ka Balang ha ryngkat ka jingdonlang jong kine ki nongmihkhmat na ka sorkar bad kumjuh ruh na ka liang u MLA ka Nongstoiñ.
“Ngam shym wan tang kum uta u DC, hynrei nga wan kum u ta u khun khasi khara ban sngewlem ïa phi ka ïing ka sem ha kaba phi ïakynduh ïa kum kane ka jingjia ba sngewsih. Kaei kaba la dep jia ngim lah leh ei ei shuh, hynrei kum kiba ngeit ngi ai ïa kata ka jingshaniah jong ngi ha u Blei. Hooid ki la leit noh hynrei haba ngi kylli shano ki la leit, ngi tip ba ki la leit sha kata ka jaka shong neh. Nga ngeit ba kata hi ka jingsngewthuh ba phi kum ka ïing ka sem ka don”, ong u Bah Garoh LSN Dykes.
“Nga pynpaw ka jingsngew burom shikatdei ïa i DC namar ha ka jingïakren ka jong ngi, i la long iba la kloi ban pyndep ïa kine ki jingdonkam. Ha ki por ba mynshwa lehse ka shim por ban ïarap sha kito kiba ngat ha ki jingjia ba sngewsih. Hynrei mynta pat ngi sngewkmen ban ïoh ïa i DC iba ïatreilang ryngkat, ha kaba tang khyndiat por eh, ngi la ïoh ban wan ban ïarap ïa kyrshan lem da ka mynsiem jong ka jingsngewlem”, ong u Bah Gabriel Wahlang.
“Lada ngin ïakren ïa kata ka jingïarap ba ka sorkar ka la ai bad ka jingduh noh ïa ki mynsiem kam ïahap haei haei ruh. Hynrei, kane ka long tang ka bynta jong ka sorkar ba haba la duh ïa ki mynsiem briew lyngba ka jingleh jong ka mariang, donkam ban ai ki jingsngewlem. Ngi ruh haba ngi wan hangne ngi wan da ka jingsngewlem bad ban duwai lem na ka bynta ka ïing ka sem, ba u Blei u ba tip khambha ïa kiei kiei baroh, un don ryngkat bad un da ri sumar ïa ka ïing ka sem hi baroh kawei”, ong u MLA/MDC Nongstoiñ.