Shillong, Jylliew, 28: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem ryngkat bad u Chairman u Bah Lamphrang Blah bad u Deputy Chairman Bah Charles Marngar, mynta ka sngi Baar kila leit ïakynduh ïa u Mynti Rangbah barim ka jylla u Dr DD Lapang ban ai khublei ïaka jingai jingshakri ka jongu ïa ka jylla bad ban kyntiew ïa ki District Council ha ka jylla.
Kane ka jingleit ïakynduh ïa u Dr DD Lapang ka dei ruh ha ka sngi ba rakhe ïa ka District Council Day bad kane ka jingïakynduh ka long kum shi bynta ban kynmaw ïa ka jingshakri jong u Bah Lapang ïa ka Jylla ha ka por ba u dang long kum u Myntri Rangbah bad uwei uba la ïadon bynta ha ka por ban kyntiew ruh ïa ka District Council.
U Bah Pyniaid Sing Syiem ula kyrkhu kyrdoh ïa u Dr.D.D.Lapang bad pyrto ïa ki kam jingshakri, ïa u syniang u bynhei mynba u dang long uba trei shitrhem ha ka kam saiñ hima sima.
Na ka liang u Dr. D.D.Lapang, ula pynpaw ka jingsngewnguh kaba khraw shibun eh ïa u CEM, namarba u la kynmaw ban wan jngoh ïa u ha kane ka sngi bad ula ai ruh ïa ki kyntien kyrkhu kyrdoh ïa ka Executive Committee kaba thymmai kaba la ïalam da u bah Pyniaid Sing Syiem, ïa ki Executive Member bathymmai bad ïaka Legislative hapoh ka jingïalam u Chairman bad u Dy.Chairman bad ula ai khublei ruh ïa baroh ki MDC jong ka KHADC.
