Shillong, Naiwieng 07 : Ka kynhun kiba don jingthut ha ki dkhot met hapoh ka lama jong ka Meghalaya Deaf Association (MDA) ha ka sngi Nyngkong ki la lehkmen lang da kaba pynkup burom ïa u samla Alexander Lyngdoh uba la ïoh ban khur ïa ka takma rnong na ka World Arm-wrestling Championship kaba dang shu leh shen ha Turkey.
Ha katei ka jingpynkupburom kaba la pynlong ha Bethany Society nalor ki dkhot jong ka MDA la donlang ruh u MLA ka Shillong North Bah Adelbert Nongrum kum u Kongsan kumjuh u Executive Director ka Bethany Society u C Noronha kum u Symbud Kongsan bad ruh ki bahaiing ha sem.
Ka MDA ka la pynkup burom lang ruh ïa u Bah Hubert Paliar uba la leit ban aireng ha katei ka lympung hynrei um shym la lah satia ban jop.
U Kongsan haba kren ha katei ka jingïalang u la ong ba ka jingjop jong utei u samla na katei ka lympungbah jong ki ri ka pyrthei ka pyni sha baroh ba kaei kaba kiwei kim lah hynrei ki pat ki lah tang namar ki shaniah dalade ïalade.
“Haba don ka mon ka lynti ruh ka don hynrei donkam pat ban aiti lut ïalade ban poi sha ka thong,” u la ong.
Na ka liang u Noronha pat ha ka jingkren ba lyngkot u la pynkynmaw ïa ka jingkmen ban ïohi ba kitei ki arngut kiba heh ba san ryngkat ha katei ka jaka, ki kylla long mynta ki nongmihkhmat ïa ka Ri bad khur takma ruh na katei ka lympung bah.
U samla Alexander ha ka khubor kaba u pashat lyngba ki dak kren jong ki, u la kyntu ïa baroh ba kin mih shakhmat ban ïakhun ha kino kino ki lympung ban pyni ïa ka sap kaba ki don. U la ai burom ruh ïa baroh kito kiba la don bynta lang bad u ha ka jinghikai bad tad haduh ba un da poi shaduh katei ka kyrdan kaba u don mynta.
