Nongstoiñ, Jylliew 2: Ha ka jingjia kaba la pynkyndit lut ïa baroh, haduh 15 ngut ki Khynnah ki la shah leh khlem akor bad leh beijot ha uwei u briew tang hapoh ka shi snem ha ka shnong Umsaw Tyllang West Khasi Hills District.
Kane ka jingjia ka la paw pyrthei hadien ba uwei u khynnah 10 snem u la kylla sohpdung ha une u briew. Katkum ka khubor, une u briew u la sdang ban leh ïa kane ka kam bymman naduh u snem 2022 tad haduh ba kut jong u bnai Jymmang 2023.
Ka khubor ka ïathuh ba ha ka 29 tarik Jymmang, une u khynnah ba shah leh beijot ha une u briew u la pyntip ïa ka jingjia sha kiba haïing kiba la ïalam ïa u sha Nongstoiñ Civil Hospital ban phah khmih ha ki doktor.
Hadien ba leh medical checkup, ki doktor ki la pynthikna ba une u khynnah u la shah leh beijot bad dei hangne ba la mih ka kyrteng jong u ne u nongleh bymman.
Ki Pulit ka West Khasi Hills ki la leit kem ïa une u briew u ba kyrteng u Meban Shangoi ha ka 31 tarik Jymmang ha ka jingïadonlang u Sordar ka Shnong lem bad ki riew rangbah ka shnong.
Katkum ka jingïathuh u Sordar, ka Shnong ka la khot ïa ka dorbar ha ka sngi palei ban ïakren ïa kane ka kam. Ka dei ha kane ka dorbar ba sa 14 ngut ki khynnah ki la phla ba ma ki ruh ki la ngat ha kajuh ka apot ha ka kti jong une u juh u briew.
La shem ruh ba napdeng kine ki 14 ngut ki Khynnah, iwei i dei i Pyrsa jong une hi u briew. Ki pulit ki la leh ïa kaba donkam bad ka jingtohkit ka dang ïaid shakhmat.
