Nongpoh, Jymmang 14: Ki Pulit ka Ri Bhoi mynta ka sngi ki la lap biang sa ïa kawei ka met ïap ba la pyud na jan jong kawei ka wahduit kaba don ha 19mer ha Ri Bhoi District.
Kumba la ïathuh da u Heh Pulit ka Ri Bhoi, la ong ba ki Pulit ki la lap ïa kane ka met ïap ba la pyut bad sma ka dei hadien ba la pyntip sha ki bor Pulit da u Rangbah Shnong ka shnong 20mer.
U la ong ruh tang hadien ba la ioh jingtip na u rangbah shnong ka shnong 20mer, halor ka jingdon katei katei ka met ïap, la phah mardor ïa ki bor pulit na Byrnihat Police Outpost ban leit tohkit bad hadien ba la poi ha katei ka jaka la lap shisha ïa ka met ïap jong uwei u rangbah kaba la pyut najan ka khlaw bad don kawei ka wahduit ba la tip kum ka wah Umrabit.
Ha kane ka jingtohkit, ki bor pulit bad wat ki bor shnong kim lah shuh ban ithuh ïa ka dur khmat jong une u rangbah ba la ïap, kaba dei na ka daw ba la pyut ka met, ong utei u heh pulit ka Ri Bhoi.
U heh Pulit ka Ri Bhoi u la ïathuh ruh ba la phah jingthoh ruh sha ka bor synshar District ban kyrpad na ka bynta ban pyndep ïa ka postmortem ha katei ka jaka kaba dei na ka daw ba la pyut katei ka met, hynrei hadien ba la wan poi u Executive Magistrate bad ki Doctor hadien ba la tohkit ïa ka met ym shym la lap kano kano ka dak mong ne mynsaw bad na ka liang ki Executive Magistrate ki la bthah noh ban rah ïa ka met sha Civil Hospital Nongpoh ban pyndep ïa ka postmortem examination., u la bynrap.
