Shillong, Naitung 03: Ka kynhun kiba wadbniah na ka Zoological Survey of India (ZSI), Shillong, ha ka jingïatreilang bad ki paralok na ZSI, Pune bad ZSI, Itanagar, ki la shem bad lap ïa ki mrad bathymmai kiba im ha ki wah ne ki um dei ki Jakoid ba don ki reng kiba im basah ha ka khlaw kaba ha Tale Wildlife Sanctuary kaba ha jylla Arunachal Pradesh, India, kiba la tip kyrteng da ki Xenophrys apatani.
Ïa kane ka jingwad bniah ba la ïalam da u Bhaskar Saikia bad Bikramjit Sinha ka ZSI, Shillong, la synran lang da u K. P. Dinesh bad A. Shabnam ka ZSI, Pune bad ka Ilona Jacinta Kharkongor ka ZSI, Itanagar. Kane ka jingshem pynkylla ïa ka jinglap kaba kham hashwa halor ka kaiphod ka jingdon ki Maoson horned frog (Xenophrys maosonensis) ha India ba la pyntip da kiba wadbniah ka ZSI, Shillong ha u snem 2019. Da kaba phai biang halor kane ka jingwad bniah la pynkut ba ka jingpynithuh ïa kine ki mrad la leh hadien ka jingwad bniah ba la pynpaw ïa ka jingdon kine ki mrad ba phylla kiba don ka jingïadei bad Specimen India bad X. maosonensis na Vietnam bad China, ha kaba kane ka la pynlong ba kin wadbniah biang.
Ka jinglap ïa ki Xenophrys apatani ka la pynpaw ïa ka jingriewspah ki mrad kiba im ha ri India bad ka jingdonkam ban pynkhlaiñ ïa kine ki kam wadbniah ba ïadei ruh halor ki jinghiar pateng na ka mariang. Ïa kine ki Jakoid bathymmai la ai kyrteng hapoh kawei ka jaitbynriew riewlum Apatani kaba ha Arunachal Pradesh, ha kaba kiba bun ki sah ha Lower Subansiri Valley ka Arunachal Pradesh.
Kane kadei kajuh ka kynhun wadbniah kaba la lap ïa ka jingdon jong ki Siju Cascade Frog (Amolops siju) napoh ka krem Siju Cave ha South Garo Hills, mynshem snem.
