Shillong, Lber, 30: Ki Pulit ka Madanriting Police Station, ha ka Sngi Saitjaiñ ki la leit ban shimti ïa kawei ka metïap jong kawei ka kynthei kaba la sahkut ha ki maw jong ka phud Umkhen kaba hap hapoh ka Dorbar Shnong Mawshbuit ha ka Dong Kharkamni.
Ïa kane ka metïap jong kane ka kynthei kaba la lyngkhuid, la lap na sharum ka Wei Thangdkhar, jong ka Wah Niamra, Mawshbuit da ki lai ngut ki khynnah rit kiba leit kai sha kane wah.
Kine ki khynnah, tang shu ïohi ïa kane ka metïap da ka jingsheptieng ki la mareh bran bran ban leit pyntip sha ki nongïalam shnong.
Na ka liang jong ki nongïalam shnong tang shu ïoh jingtip halor kane ka jingjia, ki la pyntip marmar sha ki Pulit jong ka Madanryting Police Station.
La suba ba kane ka kynthei ka dei kaba la shah rong ha ka umsaw na ka thaiñ ka Wah Umkhen.
Katkum ka jinglap ki Pulit la sakhi ba kane ka briew kam don shuh ki jaiñ phong ha ka met jong ka bad na ka liang jong u Rangbah Dong Bah Faster Field Nongdhar u la ong ba kane ka briew kam dei satia kaba napoh ka shnong Mawshbuit namarba kam shym la don ka jingjah briew hapoh ka shnong.
Kat haduh ba la thoh ïa kane ka khubor, ki Pulit ki la register case halor kane ka jingjia bad ka jingtohkit ka la ïaid shakhmat.
