Lap ba duna u khaw reshon haduh 10 kwintal 66 kilo bad 155 gram ha ka shnong Pamrakmai
Khliehriat, Nailar, 23: Ki khubor ba la pyllait na ka shnong Pamrakmai East Jaiñtia Hills District, ki ïathuh ba ki bor ba dei peit ïa u khaw rashon hadien ba ki la wan thew ki la lap ba u khaw u duna haduh 10 kwintal 66 kilo bad 155 grams bad ong ba kane ka jingduna kilo u khaw ka la buh jingeh bad ktah matïong shikatdei eh ïa ki FPS Dealer rashon bad ka wanrah jingeh ha kaba pynbit pynbiang sha ki nong ioh khaw rashon.
“Lah ban kdew ba kane ka juh ka jingeh bad ka jingkynnoh ha kaba ïadei bad ka jingduna kilo u khaw rashon, kam dei tang ha kane ka shnong, hynrei lehse ka lah ban jia ruh ha man la ki FPS Dealer jong ka District bad ha ka jylla hi baroh kawei, kumta na ka liang ka Vigilance Committee bad ka Dorbar Shnong Pamrakmai East Jaiñtia Hills District ka kyrpad bad kyntu ïa ki bor sorkar ba dei peit ba kidei ban pynbeit bad tih bniah bha halor kane khnang ba kan nym ktah ïa ki nongioh khaw rashon ha ka jylla”ong u kyrwoh.
Katkum ka jingiathuh u Secretary Shnong Pamrakmai, u bah Wellson RD Siangshai, u la ong ba hadien ba ki nongsam khaw rashon ha ka Pamrakmai FPS Centre ba la sam da ka ïahunlang V.O Pamrakmai Village, East Jaiñtia Hills District ka la pynsngew ïa ka jingeh halor ka jingduna kilo palat u khaw rashon ba la pyllait da ka ophis jong u Deputy Commissioner Supply, East Jaiñtia Hills District, la lap ba ka la mih shibun ka jingkhñium bad ka jingkynnoh na ki nongioh khaw rashon kiba don ïa ki card rashon, (Ration Card Holder), kiba la kynnoh ïa ki Dealer kiba dei ki nongsam khaw ha shnong halor ka jingbymbiang kilo bad jingduna ka jingioh khaw.
Kumta na ka Liang ka Vigilance Committee ha ka jinglamkhmat u Secretary Vigilance Committee uba dei ruh ha kajuh ka por kum u Secretary Shnong, u bah Wellson RD Siangshai, u la pynsngew ïa kane ka jingeh sha u Deputy Commissioner ka EJHD bad kyrpad ïa u ban shimkhia bad ban tuklar lem halor kane ka jingeh kaba la ktah ïa ki nongshong shnong kiba ioh khaw rashon, kumta hynnin ka sngi ka 22 tarik u nailar 2023, u Deputy Commissioner u la bthah ïa ka tnat ba dei peit ba kan leit ban thew kilo ïa u khaw sha katei ka jaka ha Pamrakmai FPS Centre, khnang ban lap ïa ka jingshisha, kumta ha kane ka jingwan thew kilo ïa u khaw rashon la ïa don ryngkat lang ka kong E.V Pariat kaba dei ka I S.I Supply Khliehriat, u bah H. Tyngkan, uba dei u Office Assistant Supply Branch Khliehriat, ka nong sam khaw, Government Wholesaler, ka Kong S. Bareh ryngkat ka FPS Dealer bad ki dkhot ka Vigilance Committee jong ka Shnong.
La ong ba ha kane ka jingwan thew ïa u khaw la lap ba man la ki byrni khaw ïa kiba ki Govt. Wholesaler ki kheiñ ba u don 49 ne 50 kilo, la lap ba ki don ha ka range kaba 42, 40, 39, 38, 37 bad 36 kilo ym kumba ki ai jingkheiñ.
Ha ka shibnai ka Wholesaler ka pynpoi ïa u khaw kumba 107 byrni u Khaw rashon jong ka shnong bad hadien ba la thew ïa kitei ki 107 Byrni la lap ba ka poi tang 43 kwintal, 1 kilo bad 845 Grams na ka 53 kwintal, 68 Grams ba kane ka FPS Centre baka dei ban ioh ha man la u bnai, te na katei ka jingthew la lap ba ka jingduna kilo u khaw ka long haduh 10 kwintal 66 kilo bad 155 grams.
La ong ba ka shnong Pamrakmai ka don 16 tylli ka Card AAY, 176 tylli ka Card PHH bad 24 tylli ka card NON- NFSA, katba ka jingioh ïa u khaw rashon pat kan long 53 Kwintal 68 Grams.
Na ka liang ka Vigilance Committee jong ka shnong ka pynpaw ïa ka jing-sngewnguh bad sngew burom ïa u Deputy Commissioner (Supply) East Jaiñtia Hills District u ba la kloi ban shimkhia bad sngap ïa ka jingpynsngew halor kane ka jingeh ba ka shnong ka kynduh ha kaba ïadei bad kane ka jingduna kilo u khaw ha kaba na ka liang jong u la pynsngew ban leh ïa ka ba donkam eiei pyrshah ïa ki Government Whole-salers halor kane.