Nongstoiñ, Nailar, 23: Ka Ophis jong u Deputy Commissioner West Khasi Hills District, mynta ka sngi balang ka la pynlong ïa ka prokram sam mobile tablet kaba hap hapoh jong ka Chief Minister’s Digital Learning Aid (M- TAB) Scheme. Ïa kine ki tablet la sam sha ki khynnah klass XI kiba lah dep register kiba dei napoh jong ka District, ha kaba baroh kiba lah dep register hapoh jong ka Distrik ki long 1467 ngut.
Ïa kane ka prokram la pynlong hapoh Trysem Hall Deputy Commissioner Office, ha kaba ka jingpynïoh ïa kine ki mobile tablet sha ki khynnah klass XI, ka sorkar ka thmu ban pynroi shuh shuh ïa ka kam pule puthi hapoh ka jylla, da kaba pyndonkam ïa ki bor teknoloji jong ka juk mynta, khnang ba kan long ka jingmyntoi ha ka pule puthi jong ki khynnah.
U Bah Gabriel Wahlang MLA jong ka Nongstoiñ, u la long u Kongsan ha kane ka sngi, ha ka jingïadon ryngkat lang jong u Bah H.K.Thabah, Additional Deputy Commissioner West Khasi Hills District, U Superintendent of Police West Khasi Hills, District, u Bikram D. Marak, I Kong L. Syiemlieh DSEO West Khasi Hills District, ki ophisar sorkar, ki nonghikai bad ki khynnah skul.
U kongsan haba ai jingkren ha kane ka sngi, u la pynpaw ka jingsngew-nguh ïa ka Sorkar Meghalaya na ka bynta kane ka jingthmu kaba bha, ban pun maw jingkieng na ka bynta ki khynnah pule lyngba ki bor teknoloji jong kane ka juk bad ban pyntikna ruh ba baroh 1467 ngut ki khynnah Klass XI hapoh West Khasi Hills kiba lah dep register kin ïoh ïa kine ki mobile tablet.
U Bah Gabriel u kyntu bad kynpham ïa ki khynnah ba ha ka pule puthi kam don ka jingkut lada ngi smat ban pule. Kumta, baroh dei ban smat ban pule khnang ba kan long ka jingmyntoi ïa ka lawei bad ha ka jingim kaba man ka sngi.
U la ong, “Ha kane ka juk ba ka teknologi ka la kiew sted bha, ka teknoloji ka pynriewspah ïa u lane ka briew lada ngi nang ban pyndonkam ïa ka. Ki khynnah ki dei ban pyndonkam hok ïa ki khnang ba kan ïarap ha ka pule ka puthi jong ki bad ha kajuh ka por ki lah ruh ban im jakpoh na ka lada ki nang ban pyndonkam”.
“Hynrei, hapdeng jong kine ki jingïohnong ki don ruh ki jingduhnong lada ngim nang ban pyndonkam ïa ki teknoloji, ka lah ban pynwit lane pynthut noh ïa ka pule puthi jong u lane ka khynnah bad kane kan ktah ïa ka jingim bad ka lawei ka jong ki”, u la ong.
“Nga kyntu jur ïa baroh ki khynnah ba ki dei ban tip bad husiar haba ki pyndokam ïa ki teknoloji jong kane ka juk, la ka dei ïa ka kor computer, mobile tablet, mobile phone bad kiwei kiwei, khnang ba kan wanrah jingïohnong na ka bynta jong ki ym ban wan rah jingduhnong, la ka dei bad ka pule ka puthi ne ka jingim ba man ka sngi ka jong ki”, u la ban biang.
Ia kane ka prokram ha kane ka sngi da ka jingkren pdiang na u Bah H.K. Thabah Additional Deputy Commissioner West Khasi Hills District, u ba la ai khublei ïa ki nonghikai, ki nongtrei sorkar bad ïa baroh kiba la trei shitom, ban pynlong ïa kane ka sngi kaba jop. La pynkut ïa kane ka prokram da ka jingkren khublei da u Bah A. Lyndem, RO Planning, West Khasi Hills District.
