Ka jingkhih jong ka tnad Tourism jong ka sorkar jylla ban wanrah ïa ka jingkylla ha ki bynta jong ka Khyndailad da kaba pynlong katto katne ki jaka kum ki jaka ïaid kjat bad ruh ban pynkylluid noh ïa ki rud ki kiar khlem da shah shuh ïa ki nongdie jingdie ba kin die ha rud surok. Watla kane ka sienjam kadei ka jingphohsniew ba ka tnad ka don hynrei haduh mynta ka dang neh ha suiñ bad ym lah ban tip lano kan urlong bad la kan lah neem ban urlong.
Lah ruh ban kdew hangne ba ka jingitynnad jong ka mariang bad ka jingpynngad jong ka suinbneng kadei ka dawbah kaba ka nongbah Shillong ka ïoh ïa ka nam naduh ka por ba synshar ki Phareng kum ka Scotland of the East. Kane hi ka la khring shisha ïa ka jingwan jong ki nongjngohkai pyrthei. Kumta ha ka kyrteng jong ka jingpynroi ïa ki kam jngohkai pyrthei ba ka tnad ba dei peit jong ka sorkar ka Tourism Department ka ïaleh katba lah ban shna ïa ki iing ne ki Hotel khnang ba ki nongleit nongwan kin suk bad ha ka juh ka por ba yn lah ruh ban wanrah ïa ka jingïohnong ïa ka jylla ban kyntiew ym tang ïa ka ïoh ka kot hynrei khamtam eh ïa ka ïoh kam ïoh jam jong ki samla bad ki nongshong jong ka jylla hi baroh kawei.
Ym lah ban len ïa ka jingshisha ba ban khring ïa ki briew kiba nabar la ka dei na ki jylla ba marjan, na la ka ri India bad ruh kumjuh kito kiba na shabar ka ri nongbah Shillong ka dei ka bynta kaba ha khmat eh ba baroh kin ym lah khlem da ïuh kjat. Khamtam eh ka thain Police Bazar ne ka Khyndailad ka dei ka bynta kaba kongsan eh bad ka long kum ka kamra shongkai hapoh ka iing.
Ka long ruh ka khubor kaba sngewtynnad ïa kito kiba ieit ïa ki kam ban pynitynnad bad ri sumar ïa ka mariang ban ïohi ba ka sorkar mynta ka la pynkhreh wat ban pynkylla noh ïa ka surok na Khyndailad sha Umsohsun bad kumjuh sha Jail Road kum ki lynti ïaid khnang khlem da shah shuh ïa ki kali ban ïaid. Kane ka sienjam lehse kan pynkylluid bad ailad ïa ki nongwan jngohkai pyrthei ba kin ïoh ïaid laitluid bad pyngad haba ym don shuh kiba pynwit ha ki lynti syngkien kaba ju don baroh shi katta da ki nongdie madan. Hynrei lada kren pat ha kane ka liang, ki nongdie madan kiba ju im da kaba die jingdie kum ki mar khutia la ka long naduh ki kwai tympew, ki jain ki nep, ki tiar shna kti bad kiwei kiwei ki donkam lang ïa ka hok ruh ban im ban pyndap ïa ka iing ka sem. Kumta haba ïadei bad kane ka bynta ruh ka sorkar ka hap ban bishar arsien lai sien hashwa ba kan shim ïa kane ka rai lane da ka buh da kawei ka kynja ïew ïa ki ruh kadei ban ym da jngai than na ki jaka ba ïaid ba ieng ki paidbah.
Ha kawei ka liang donkam ruh ban ai ka jingïaroh ïa ka sorkar kaba thmu ban pyrshang da katei ka buit namar khlem da pyrshang ym lah satia ban tip kaei kaban jia, ïoh lehse kumno re kumno ka ïahap bad ka jinglong ka jaka bad ba ki nongleit nongwan ki ïahap jingmut bad ïaroh ïa katei ka sienjam. Kawei pat kaba ka sorkar lyngba ka tnad Tourism ka leh kata ban buh da ki nongput nongtem ha shi lynter katei ka lynti ïaid lehse kan dei kawei pat kaban pynshongshit ïa ki nongleit nongwan ba kin sngewtynnad ban ïaid kjat khamtam eh ïa kito kiba mih na ki jaka trei, jaka bylla bad wat haduh kiba wan thied wan pet.
Kiban myntoi bad kmen palat eh na katei ka jingpyrshang jong ka sorkar kin dei ki khynnah rit namar kin ïoh ïaid khlem jingtieng shuh ïoh wan kali na shadien ne na shakhmat. Ym tang katta, ka jingbym shah shuh ban ïaid kali na pdeng surok kan pynlong ïa ki dukan die jingdie ha baroh arliang ba kin pynitynnad shuh shuh ïa ki dukan jong ki khnang ban khring shuh shuh ïa ki nongthied nongpet.
Ha kajuh ka por sngewdei ruh ban ai jingmut ïa ka sorkar haba ka ong ba kan pynlong ïa ka Khyndailad kum ka jaka pdeng ban pdiang sngewbha ïa ki nongwan jngohkai pyrthei ba kin pynlut por kham bun bad ban sngewhun ïa ka jingwan jong ki, donkam ruh ki rynsan kiba kham biang ba ki khun samla ne ki samla ba don ah ka sap ka put ka tem ba kin ïoh ban pyni paidbah. Kane kam dei ruh ban kut tang katne, donkam ruh ba ka sorkar kan ïarap ruh katto katne ïa kum kitei ki samla khnang ba ma ki ruh kin ïoh mynsiem bad kin lah ban pyntbit shuh shuh ïalade ha katei ka sap kaba ki don.
Ka Meghalaya kaba ju paw kum ka nongbah jong ki sur jingrwai ha ka India baroh kawei lada ka bteng ban leh kumta ka lah ruh ban long ha kawei ka sngi ban long kum kata ka jylla kaba bun kin sa im lyngba ka kam jngohkai pyrthei kata naduh ki nongleit buh leit shaw ïa ki nongwan kai, ki nongbuh ïa ki jaka sah, ki nongdie dukan, ki nongpeit ïa ki jaka jngohkai, ki nongdie jingdie ha ki rud surok, ki nongïalam ïa ki nongwan kai bad khamtam eh baroh ki nongshong shnong kin sa sngewtynnad ban sumar bad pynneh pynsah ïa ka mariang khamtam eh ban pynneh ïa ka khuid ka suba thik kumba leh ka shnong Mawlynnong.
