Nongstoiñ, Naitung 11: Ka jingpynmih biskot ha une u snem ka duna haduh katta katta bad wat haduh kine ki sngi ruh, ka dor jong u biskot ka poi sanphew haduh hynriew phew tyngka shi kilo. U bah Sherfulman Sohshang na ka shnong Marngor haba pyntip ha u nongthoh khubor u la ong ba ha ki snem ba la dep, ki shnong kiba don ha katei ka thaiñ naduh Nongkasen, Markasa, Umlipoi, Upper Laitkseh, Lower Laitkseh, Marngor, Mawlaisyiem, Makhanpambeh, Langlew bad kiwei kiwei, naduh ka taïew ba khatduh jong u bnai Jymmang ki la sdang ban ïoh kheit biskot.
Katba ha u bnai Jylliew ka dei ka por ba u biskot u kiew dor bha bad ha ka shi sngi tang na ka shnong Marngor, da ki phew tylli ki Mahindra pickup ki ïeng laiñ ban thep biskot. Hynrei mynta u snem haduh kine ki sngi, ki nongshong shnong kiba la rep bun ruh ha ka shi taïew tang marshiteng ïa kaba ki ju ïoh kheit man u snem ruh kim pat ïoh. U la ong ruh ba haduh kine ki sngi ki jyntang biskot kim pat dap lut ïa ki rynsan khamtam eh lada ym lah ban ai sboh bha.
U bah Sohshang u la ong ruh ba ha ki snem ba la dep, ha u nai Naitung ka dor ïew jong u biskot lada ka heh katno katno ruh ka poi tang arphewsan haduh laiphew tyngka, namar ba ka jingpynmih biskot ka khlaiñ bha. Hynrei mynta u snem imat ba haduh u bnai Nailar ruh ka dor biskot kan ym pat hiar. Lada ka hiar ruh ka lah ban long tang lada ki nongkhaï ki shim kabu, hynrei ka jingpynmih biskot te kan dang duna hi.
