Jowai, Kyllalyngkot 23: Ka jingïalehkai Athletics jong ka 6th Meghalaya Games 2025 ka la jam mynta sha ka sngi ba ar. Ha man la ki jingïalehkai, ka jing-ïakhun ka nang jur katba ki nongïalehkai ki nang pyni ïa ka jingtbit bad jingaiti lut jong ki, kaba pynlong ïa ka Meghalaya Games kaba 6 kum ka rynsan ba paka na bynta ki khynnah samla ban pynpaw pyrthei ïa ka sap kaba ki don.
ïa mynta, ka West Jaintia Hills (WJHD) ka lamkhmat ha ka thup khur takma ha ka jingïalehkai Athletics da kaba jop 6 tylli ki takma ksiar, 2 tylli rupa, bad 2 tylli ki rnong. Ka East Khasi Hills (EKHD) ka bud ha ka kyrdan ba ar da 4 tylli ki ksiar, 2 tylli rupa, bad 3 tylli ki rnong, ka Ri-Bhoi District ha ka kyrdan ba lai da 2 tylli ki ksiar, 4 tylli rupa bad kawei ka rnong.
Ha ka jingïakop mareh ba 10,000 m jong ki shynrang, u Kresstarjune Pathaw jong ka South West Khasi Hills (SWKHD) u la lah ban pyndep hapoh 32:20.39 sekon ban khur ïa ka takma ksiar. Nangta bud sa u Banjoplang Wanniang bad u Wanbok L. Mawphlang kiba na West Khasi Hills (WKH), kiba la khur ïa ka rupa bad rnong marïabud.
Ha ka jingïakop mareh ba 3,000 m ki kynthei la sakhi ïa ka Gloryfy Kurbah na East Khasi Hills (EKHD) kaba la ïoh ban khur ïa ka takma ba ar jong ka ha kane ka lympung, da kaba shimopor 11:36.53 sekon ban pyndep ïa ka jingmareh. Ka Marqueen-less Ramsiej na SWKHD ka la ïoh ïa ka takma rupa, bud sa ka Balarisha Thyrniang jong ka EKHD kaba la khur ïa ka rnong.
Ha ka long jump, ka Joytiful Narlong (Ri-Bhoi) ka la jop ïa ka takma ksiar hadien ba lah kynthih ïa ka jingjngai haduh 4.75 mitar. Katba ka paralok jong ka, ka Doralin Ronghi ka la khur ïa ka takma rupa, nangta ka Tiewlari Rynshiang (WKH) ka la ïoh ïa ka takma rnong.
Ha ka thup jong ki shynrang, u Renaldi Dhar na West Jaintia Hills (WJHD) u la khur ïa ka takma ksiar hadien ba lah kynthih haduh 6.45 mitar, ban tam khyndiat ïa u Jebirth Ch Marak na West Garo Hills (WGHD), u ba la khur takma rupa.
Ha ka jingïakop mareh ba 400m, u Kyrshanlang Shylla na WJHD u la poi sha ka thong ha ka final, da kaba shimpor 51.46 sekon ban pyndep, katba u Donbok Shabong EKHD u la khur ïa ka rupa.
Ha ka liang ki kynthei ka WJHD ka la khur ïa ka takma ksiar lyngba ka Damika R. Lyngdoh kaba al shimpor 1 minit bad 02.37 sekon, bud sa ka Ritina Hanse (Ri-Bhoi) kaba la ïoh ïa ka takma rupa.
Ka sngi ka la kut da ka jingïamareh relay kaba itynnat, ha kaba ki kynhun jong ka WJHD ki la tyngshaiñ. Ka kynhun jong ki kynthei ka la jop ïa ka 4x100m relay da kaba shimpor 55.44 sekon ban poi sha ka thong, bud sa ka Ri-Bhoi bad ka EKHD. Ha ka Men’s Relay, ka WJHD sa shisien ka la jop biang da kaba shimpor 45.59 sekon ban pyndep ïa ka jingmareh, katba ka EKHD bad ka North Garo Hills (NGHD) ki la khur ïa ka nam rupa bad ka rnong, marïabud.
