Da ka Stadium ba ngiam 40 hajar ngut yn tei ka Sorkar ha Mawkhanu

0

Shillong, Kyllalyngkot 23: Kan long ka khubor kaba sngewtynnat ïa ka Jylla Meghlaya khamtam ïa kiba sngewtynnat bad ieit ïa ka phutbol hadien ba u Myntri Rangbah ka Jylla – u Conrad K Sangma u la pyntip ba ka Sorkar ka thmu ban wanrah ïa ka madan phutbol kaba lah ban ngiam haduh 40 hajar ngut ki nongpeitkai ha ka jinglut kaba palat 400 klur tyngka ha Mawkhanu ha u snem 2028. Kane ka madan phutbol kan long kaba heh tam hapoh ka ri.
“Ngin sa wanrah ruh ïa ka Mawdiangdiang sports complex, ha kaba yn don ïa ka aquatics complex bad ka Lawn Tennis complex (ban tei ha ka jinglut kaba 150 klur),” la ong u Myntri Rangbah ka Jylla haba ai jingkren sha ki lad pathai khubor ha ka sngi Balang.
Lah ban kdew ba ka Sorkar MDA ka la pynlut palat T.1000 klur ha ka ban tei ïa ki madan bad jaka ïalehkai ha kine ki hynñiew snem ba ladep. “T.1000 klur la pynlut na ka bynta ban tei ïa ki madan & jaka ïalehkai naduh u snem 2018” u la ong.
U MR u la ïathuh ba palat T.6 klur la ai sha ki 3500 tam ki nongïalehkai bad ki coach kaba hap hapoh ka Cash Awards Scheme bad palat T.2.5 klur la ai sha kumba 350 ngut ki nongïalehkai hapoh ka Sports Scholarship Scheme.
U la ong ba T.2 klur na ka jinglut jingsep baroh la ai sha ki synjuk ïalehkai (sports association) kiba don hapoh ka jylla man la u snem bad T.50 klur la pynlut ruh man la u snem ha ki rynsan ïalehkai, kynthup ïa ka jingpynbha ïaki jingtei ba la rim da kaba bynrap ba la pynlut lang ruh ïa ka pisa kaba T.8 klur kum ka jingai jingkyrshan.
Tad haduh mynta, la lah ban tei haduh 300 tylli ki jaka bad madan ïalehkai ha kylleng ka jylla. Baroh ki don 10 tylli ki lympung ïalehkai kyrdan national & international ba la pynlong da ka Jylla naduh u snem 2022 bad palat 2500 tam ki la ïoh kam lyngba kum kine ki lympung man la u snem.
Haba phai sha ki snem ba la dep shuwa ba ka sorkar MDA kan shimti ïa ka bor, u MR u la ong ba ka don tang 100 klur tyngka ba la mynjur na ka bynta ki projek pynroi ïa ki jingïalehkai bad ki don ki jingai jingïarap kaba khyndiat ba la ai sha ki synjuk ïalehkai jong ka jylla.
“Ym shym la don ki prokram ithuh sap/hikai ïa ki sap (talent identification/training program) ba la bei tyngka da ka sorkar,” u la ong da kaba bynrap ba katba mynta, ki don palat 24500 ngut ki nongïashim bynta ha ka prokram ID.
Katkum ka jingkren jong u, kawei ka lympung ïalehkai International ba ka Jylla ka la lah ban pdiang pynlong ka dei ka South Asian Games ba la long ha u snem 2016.

Leave A Reply

Your email address will not be published.