Nongstoiñ, Lber 26: Ka jingthang dusmon jong ki riew shim kabu ïa ki khlaw ki btap bad ki lum ha kine ki aïom ryngkhiang, ka jur haduh katta katta ha kylleng ki jaka kata ha West Khasi, Eastern West bad South West Khasi khasi Hills Distrcit.
Katei ka jingthang dusmon ïa ki khlaw kseh bad ki lum phlang ka buh ha ka jingma kaba khraw ïa ki ïing ki sem khamtam ha ka por mynsngi ha kaba ki tymmen ki leit trei sha ki jaka ba jngai.
Ha kane ka sngi balang kawei ka khlaw kseh kaba don ha ka shnong Ksehkohlong, harud ka surok bad leit sha Umyiap, ki riew shim kabu ki bym lah ban tip ki la thang dusmon ïa ka khlaw kseh, ha kaba da ki hajar ki diengkseh kiba dang rit bad palat spah tylli kiba la kha heh ki la shah bam duh ha ka thylliej ding bad ingkhong lut khait.
Nalor kata la lap ruh ba ha jan katei ka khlaw kseh ka don ka ïing briew hynrei don bok ba ka sañium bad ki phlang kim da rben than ha kaba ka thylliej ding kam shym la kot haduh katei ka ïing. Wat la katta ruh ki khynnah rit kiba don ha phyllaw jong katei ka ïing ki la ong ba ha ka por ba ki ïohi ba ka tdem ding ka ba jur ka mih na shaphang jong ka surok, ki la peit lyngngoh bad tang shiphang ka thylliej ding ka la kiew haduh kliar jong ki dieng kseh bad ki la lynñiar bad pyrta briew hynrei ki don tang kynthei ha shnong namar ka dei ha ka por pdeng sngi.
Ki la ong ruh ba ki longkmie ki ba don hangta ruh kim nang leh ei ei shuh hynrei ki shu hylla bad pyrta shla hynrei ym don rangbah satia kiba ïoh sngew. Don bok ba ka lyer ruh kam da jur than kum ha ki sngi ba la dep ha kaba katei ka ïing ka la shu lait thaw salit na ka thyliej ding.
Haba phai sha ka jingthang dusmon ïa ki khlaw ki btap bad ki lum khamtam eh ha ka aïom tlang ha ki sngi ba jur bha ka lyer, ka dei ka kam bymman kaba shyrkhei bha, namar ka buh jingma ym tang ïa ki ïing ki sem hynrei wat ïa ki mynsiem briew bad ki jing ri jingdup.
Nalor kata ka pynduh jait lut ïa ki tynrai dieng kiba dang rit bad wat ka khyndew ruh ka kylla lyngki noh, namar tang shu wan u slap ïa ka sboh baroh ka um ka kit lut bad suki suki ki lum ki kylla synlen ha kaba wat u phlang ruh um mih shuh.
Haba phai ha ka jingthang pathar ïa ki lum bad ki khlaw ki btap la I don kam ba ki dorbar shnong ki la dei ban pynlong da ki jingpynshai paitbah man ka por shuwa ban poi ka tlang.
Namar lada ki dorbar shnong kin shu shaniah ba kiba ïaid ba ïeng bad ki khun shnong khun thaw kin ïa pule ïa ki adong ba la thoh ha ki sign board hapoh shnong, kam lah ban long satia bad ki paitbah nong shong shnong ruh ki la dei ban peitngor bha.
Lada ki lap ne ki ïohi ïa kino kino ki briew kiba mlien ban thang ding pathar ïa ki lum bad ki khlaw ki btap, ki dei ban pyntip mar mar sha ki rangbah shnong khnang ba kin leh ïa kaba donkam.
