Dang don neem ki dieng ha ki khlaw ka Council ha Aradonga, kylli u MDC ka Rambrai Jyrngam

Shillong, Lber 26 : U Chief Executive Member ka KHADC Bah Shemborlang Rynjah ha ka sngi Nyngkong u la pyntip ha Iing Dorbar ba ki don haduh 11 tylli ki jaka khlaw (Plantation) ba ka Council ka don ha u pud u sam jong ka.
Haba jubab halor ka jingkylli ba wanrah da u MDC ka Rambrai – Jyrngam Bah LurshaI Kharbani na ka liang u CEM u la pyntip ba kitei ki 11 tylli ki kynthup ïa ki lai tylli ha West Khasi ba kynthup ia ka Lad umshing Plantation bad ka Aradonga , nangta ka Lailad, ka Sohlait, ka Umtham, Lumshadryntoh, Umsaw Nongkharai, Byrnihat, Lumsohpetbneng bad Lumshangi ha Ri Bhoi District.
Nangta haba jubab shuh shuh halor ka jingkylli u CEM u ïathuh ba ki dieng kiba don ha Aradonga ki dei ki dieng Teak bad ki dieng Sal.
Tangba halor ka jingkylli bynrap ba la kitei ki dieng ki dang don neem u CEM u la ong, “Ngi dang hap ban pan jingtip halor kane.”
Shuh shuh haba jubab halor ka jingkylli na u MDC ka Mawshynrut Bah Srally Rashir, u CEM u la ong ba ki dang shimti tang hapoh shi bnai ei ei bad kumta ki dang hap ban lum jingtip shwa halor kine baroh.