Shillong, Lber, 07: Kawei ka kynthei kaba la 35 snem ka rta na East Jaiñtia Hills District kaba thmu ban leit trei sha nongbah Delhi ka la lait phet da ka said na ka tyrsim jong uwei u runar uba la thmu ban khaii beaiñ ïa ka da kaba kular ban pynpoi ïa ka sha ka jaka ba ka trei.
Ha u kyrwoh ba la phah da ka Khasi Students’ Union (KSU) Delhi Unit ha ka sngi Thohdieng, la pyntip ba la ïoh phone call ha kane ka sngi halor kawei ka jingjia ba kawei ka kynthei ka la lait phet na ka kti jong ki runar kiba la thmu ban khaii be-aiñ ïa ka.
Ka seng ka la pyntip, tang shu poi sha ka jaka ba ka lanot ka don, ki dkhot ka seng ba la lamkhmat da ka President jong ka KSU Delhi Unit ka samla Marbiang Khongwir bad u Organising Secretary u samla Julian Thabah ki la lap ba kane ka kynthei na East Jaiñtia Hills ka la poi sha Delhi hadien ba la kular ban ïalam ïa ka sha ka jaka ba ka trei. Hynrei tang hapdeng katto katne por ka la sngewthuh ba ka la shah die bad shu lait phet ruh da ka said na ka kti jong ki runar.
Ka President jong ka KSU Delhi Unit bad u Organising Secretary u samla Julian Thabah ryngkat bad ki dkhot ka SPUNER, mar mar ki la leit sha Old Delhi Railway Station bad ban ïarap ïa ka lanot ban ujor sha ki Pulit. Hadien ba la pyndep ïa ki jingdonkam katkkum ka aiñ, ki dkhot ka seng ki la shimti ban pynpoi biang ïa ka sha Meghalaya.
Ka KSU ka pynpaw ruh ïa ka jingsngewnguh ïa u Bah D. Dkhar na Raliang, ka SPUNER bad ki Pulit ka Delhi kiba la shimkhia marmar ïa kane ka kam. Kumjuh ruh ka seng ka ai khublei ïa MLA jong ka Jowai Constituency Bah Wailadmiki Shylla uba la ïarap pisa ban pynpoi biang ïa ka lanot sha la ka jong ka shnong bad ki bahaiing hasem.
Ka KSU Delhi Unit kaba la ju lap bunsien ïa kum kine ki jingjia namarkata ka la kyntu ïa ki paidbah nongshong shnong ka jylla Meghalaya ban long kiba husiar haba leit wadkam wadjam shabar ka jylla Meghalaya.
“Ngi ai jingmut ïa ki paidbah ba kin dei ban long kiba phikir bha bad ban shim ruh ïa ka jingkitkhlieh na ka bynta ka jingshngain ka jong ki. Shuh shuh ngi kyntu ïa ki nongshong shnong kiba wadkam ha Delhi ne ha NCR region ban pyntip sha ka seng shwa ban pdiang ïa kino kino ki jingtyrwa kam na kino kino ki nongkular aikam.
