Lait ïashimbynta 7 ngut ki MLA ka Jylla ha ka National Leadership Programme ha Bengaluru

Shillong, Jymmang 13: Hynniew ngut ki nongthawaiñ (MLA) ka jylla Meghalaya ki la leit ïashim bynta ha ka State Legislators Leadership Programme kaba lai sngi ha Bengaluru, da ka jingthmu ban pynkhlaiñ ïa ka kam thawaiñ bad ban sngewthuh ïa ki polisi ha kaba ïadei bad ka synshar paidbah bad ka jingmih ki jingtynjuh ha kaba ïadei bad ki kam pynroi.
ïa kane ka prokram la pynlong ha ka 10–12, tarik u Jymmang 2026 ha Azim Premji University, Bengaluru, ïa kaba la pynlong lang da ka Azim Premji University bad ka PRS Legislative Research.
ïa ka Residential Leadership Programme ka dei kaba la pynwandur ban pynkhlaiñ ïa ka jinglah ki nongthawaiñ lyngba ka jingpynleit jingmut ha ki jingïatai halor ka kam synshar paidbah, ki polisi paidbah, jinglong nongïalam bad ka jingmih ki jingtynjuh ha kaba ïadei bad ki kam pynroi.
Ka kynhun na Meghalaya ka kynthup ïa u Deputy Speaker bad u MLA ka Raksamgre u Limison D Sangma, u MLA ka Nongpoh u Bah Mayralborn Syiem, u MLA ka Umsning u Dr. Celestine Lyngdoh, u MLA ka Mylliem u Bah Ronnie V. Lyngdoh, u MLA ka Nongstoin u Bah Gabriel Wahlang, u MLA ka Mawsynram u Bah Ollan Sing Suin bad u MLA ka Mawphlang u Bah Matthew Beyondstar Kurbah.
Ha kane ka prokram la don ka jingïamir jingmut bad ki riewshemphang da ka jingthmu ban kyntiew ïa ka jingryntih ha kaba ïadei bad ki kam thaw ïa ki aiñ ki kanun bad ban sngewthuh ïa ki polisi treikam.
Ki mat kiba kongsan ki kynthup kumno ban long ki nongthawaiñ kiba tbit, ban pynleit jingmut ha ki kamram kum ki nongthawaiñ bad ki atiar kiba don na ka bynta ki nongthawaiñ bad ki mat kiba kongsan kiba ïadei bad ka pule puthi, ban khmih bniah ïa ki jingtynjuh bad ïa ki lad ki kabu hapoh ka ri India halor ka pule puthi.
Ha ka jingïalang la ïatai ruh halor ka koit ka khiah ïa baroh, ki jingsngewkhia ki paidbah ha kaba ïadei bad ka koit ka khiah bad ki polisi kiba lah ban treikam, ban sngewthuh halor ka jingpyndonkam ïa ka pisa paidbah bad ka kamram kaba kongsan jong ki nongthawaiñ ha kaba ïadei bad Mang Tyngka.
Ki nongïashim bynta ki la ïakren ruh halor kiwei kiwei ki mat kaba kynthup ïa ka jingkylla lyngba ka jingdon jongka Artificial Intelligence ha man la ki liang kum ha ka koit ka khiah, ka pisa pilaiñ, jingai jingshakri ïa ki nongshong shnong bad kumjuh ïa ki jingeh kiba ïadei bad ka jingïohkam ki samla, ka sap ka phong bad ka rukom pynwan na ka jingpule sha ka jingkamai.
La pynlong ruh ïa ka jingïakren kyrpang ha kaba ïadei bad ki lad pynïasoh bad ki kor digital bad ban wad ïa ki lad ki lynti ban pyndon bynta ïa ki paidbah lyngba ka jingthaw ïa kiei kiei kiba phylla ha kane ka juk Digital.