Ba kyntait ka KHADC ïa ka Resolution u (L) JJM ban pynbna shuti, thoh u MDC sha u Myntri Rangbah

Shillong, Jymmang 13: U MDC ka Laban-Mawprem Constituency u Bah Ricky Shullai ha ka sngi balang u la leit ban aiti noh da ka jingthoh sha u Myntri Rangbah ka jylla u Conrad Sangma ba ka sorkar kan pynbna shuti noh ïa ka lyngkhuh sngi khlad jong u (L) Rev. JJM Nicholsroy uba dei u riew rangbah na ka jylla uba la ohshrong, ba la pynwandur bad uba la pynïoh ïa ka 6th Scheduled ban pynneh ïa ka riti synshar, ka khaïi pateng bad khamtam ban ïada ïa ka khyndew ka shyiap ha kane ka jylla Meghalaya.
Hadien ba la dep ban kynduh ïa u Myntri Rangbah ka jylla u MDC ka Laban-Mawprem u Bah Ricky Shullai u la ong ba hadien ba ka Executive Committee ka KHADC kam pdiang ïa kane ka Resolution ba la wanrah dangshen, um banse ban leit rah noh ïa kane ka mat ha u Myntri Rangbah bad hadien ba kynduh ïa u Conrad Sangma u la ong ba un sa peit bniah ïa kane ka kam kaba long kaba kongsan bad kumjuh ruh na ka liang u MDC u la ong ba ka shong ha ka sorkar watla ka Executive Committee ka KHADC kam pdiang ïa kane ka resolution ba u la wanrah dangshen hapoh ka Ïing Dorbar KHADC.
Watla ïa u Rev. JJM Nicholsroy la tip ba u la long uwei na ki nongpynwan dur, nongoh shrong bad nongwanrah ïa ka 6th Scheduled na ka bynta ki lad jingïada ïa ki riti dustur, ki kolshor bad khamtam eh ïa ka khyndew ka shyiap ïa ka jylla Meghalaya bad kiwei pat ki 4 tylli ki jylla kiba la ïoh ïa ki Autonomous District Council.
Watla une u riew rangbah na ka jylla Meghalaya ula ïaleh shitom ban pynïoh ïa ka 6th Scheduled kaba dei kaba kongsan bha ha ka jylla, hynrei haduh mynta mynne ym shim ba la don ba ai ka jingithuh kaba kyrpang ban kynmaw ïa ki kam babha bad kumjuh ruh ïa ka jingmut jong ka 6th Scheduled.
Kumta halor kane, wat hadien ba utei u MDC u la dep ban wanrah da ka Resolution hapoh ka Ïing Dorbar Thaw Aiñ ka KHADC ba dangshen, hynrei lyngba ka jingñiew vote ula shah rem noh bad wat hadien ba u la shah rem ruh u la pyntip ba un ïaid shakhmat ïa kane ka kam ban ïakren pat sa bat ka sorkar jylla bad dei hadien ba la dep ban ïapynbeit ha baroh ki bynta jong ka kam, utei u MDC u la leit ban kynduh ïa u Myntri Rangbah ban pynsngew ha u halor kane ka jingdonkam kaba kongsan bha.
“Kum u dkhot MDC ba la shah jied nga sngew kadei ka kamram ka jong nga ban rah ïa kane ka mat kaba kongsan naba mynta lah bun tylli ki snem ba ngi la ïoh ïa ka 6th Scheduled ne ka jingdon ki Autonomous District Council ha kane ka jylla jong ngi ban ïada ïa ka khyndew ka shyiap, ka riti ka dustur bad ka synshar khaddar, hynrei ngim pat ai kano kano ka jingithuh kaba kyrpang ne ban buh ka sngi ba kyrpang na ka bynta jong u, kumta kum u MDC nga kyrmen ba ka sorkar kan sa shim khia halor kane ka kam kaba kongsan khnang ba ïa u JJM Nicholsroy yn ïoh ka jingithuh ha baroh kawei ka pyrthei ïa ki kam ba ratbah jong u ban ïada ïa ki riti dustur, ka synshar khaddar bad kiwei kiwei,” ong u Bah Ricky Shullai.